«Барселона» ҳужумчиси Лионель Месси Испания Суперкубоги финалида «Атлетик Б»га қарши кечган ўйиндаги (2:3) ҳаракати учун узоқ муддатга дисквалификация қилиниши мумкин.
Месси учрашувнинг қўшимча бўлимлари тугаётган бир вақтда «Атлетик» футболчиси Асер Вильялибренинг бош қисмига қўли билан зарба берганди. Натижада ҳакам Хесус Хил Мансано видеотакрорлардан кейин Леога тўғридан-тўғри қизил карточка кўрсатди.
Агар мусобақалар ўтказиш қўмитаси аргентиналик футболчининг ҳаракатларини агрессив деб ҳисобласа, у ҳолда «Барселона» сардори камида 4 та ўйинга четлатилади, узоғи билан эса — 12 ўйин.
Қайд этиш керак, Суперкубок учрашувидаги ҳаракат учун қўлланиладиган жазо Испаниядаги барча мусобақалар учун тааллуқли бўлади.
Маълум бўлишича, учрашув бош ҳаками ўз ҳисоботида Мессининг ҳаракатини агрессив деб қайд этмаган. Агар қўмита ҳам Мессининг ҳаракатида агрессивлик йўқ деб ҳисоблайдиган бўлса, футболчи иккита ўйинни ўтказиб юборади.
Эслатиб ўтамиз, Месси «Барселона» сафида илк бор, 753 ўйин деганда биринчи марта қизил карточка олди. Аввалроқ у Аргентина терма жамоаси сафида икки бор майдондан четлатилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)