Фаластинда сўнгги 15 йил ичида биринчи бор парламент ва президентлик сайловлари бўлиб ўтади. Бу ҳақда мамлакат президенти Маҳмуд Аббосга таяниб «Korrespondent.net» хабар берди.
Таъкидланишича, Маҳмуд Аббос «демократик сайлов жараёнини» бошлаш бўйича топшириқ берган.
«Президент сайлов комиссияси ва барча давлат аппаратларига мамлакатнинг барча шаҳарларида демократик сайлов жараёнларини бошлаш топшириғини берди», — дейилади хабарда.
Ўз навбатида Reuters’нинг ёзишича, бу орқали амалдаги президент «узоқ йиллик ички қарама-қаршиликни бартараф этиш» ниятида.
2020 йилнинг ноябрида Фаластин Исроил билан алоқаларини қайта тиклаши маълум бўлганди. Исроил ҳам ўз навбатида Фаластин билан ярашиш зарурлигини таъкидлаб, турли соҳалардаги ҳамкорликнинг истиқболлари ҳақида тўхталиб ўтган эди.
Эслатиб ўтамиз, январь ойининг охирларида АҚШ президенти Дональд Трамп Оқ уйда Исроил бош вазири Беньямин Нетаньяху билан чиқиш қилиб, Фаластин—Исроил можаросини барқарорлаштириш бўйича ўз режасини тақдим этганди. Кейинроқ Фаластин президенти Маҳмуд Аббос Трампнинг таклифига «Қуддус сотилмайди» дея жавоб қайтарган эди.
Изоҳ (0)