Нидерландия ҳукумати болалар нақафаларидаги фирибгарлик борасидаги хато айблов сабаб жабр кўрган минглаб оилалар можароси фонида истеъфога чиқди, деб хабар беради Dutch News нашри.
Таъкидланишича, тўрт партиядан иборат коалициянинг тарқалиши кутилмаган ҳодиса бўлмаган, айниқса, 14 январь куни лейбористлар етакчиси Лодевик Ашернинг истеъфога чиқиши тўғрисидаги қароридан кейин. Ашер можаро вақтида ижтимоий таъминот вазири бўлган. Минглаб оилалар хатолик сабаб солиқ хизматлари томонидан фирибгарликда айбланган эди. Улар ҳатто нафақаларни қайтариб тўлашига бир баҳя қолган. Мазкур ишга вазирлар, ижтимоий хизмат ходимлари, парламент ва судьялар алоқадор бўлган.
Нидерландия бош вазири Марк Рютте ўз лавозимида қолишни ва коронавирус пандемиясини ҳал этишни истаган, бироқ бошқа партияларнинг етакчилари можаронинг «сиёсий оқибатлари»дан қочиб бўлмаслигини маълум қилган.
Вазирлар 2021 йил 17 март куни ўтказиладиган сайловларга қадар ўз вазифаларини вақтинча бажаришда давом этади. Аммо улар парламентнинг қуйи ва юқори палаталари маъқулламаган қарорларни қабул қила олмайди.
Эслатиб ўтамиз, 2020 йилнинг декабрь ўрталарида парламент қўмитаси мамлакатдаги кўплаб ота-оналар Давлат солиқ хизмати ва Божхона бошқармаси томонидан болалар нафақаси тизимини суиистеъмол қилганлиги айблови келтирилгани тўғрисидаги текширув натижаларини эълон қилганди. Ҳужжатда таъкидланишича, камида 9 мингта оила томонидан хатоликка йўл қўйилган, бироқ аслида уларнинг сони анча кўп. Вазият бўйича масъулият вазирлар, давлат хизматчилари, парламент депутатлари ва ҳатто судьялар зиммасига қўйилган.
Изоҳ (0)