Самарқанд вилояти ҳудудида 2020 йил содир этилган йўл-транспорт ҳодисалари сони 2019 йилга нисбатан 64 тага камайган. Бу ҳақда «Дарё»га вилоят ИИБ ЙХҲБ бошлиғи ўринбосари Абдунаби Тўраев маълум қилди.
Таъкидланишича, 2019 йилда вилоятдаги ЙТҲлар сони 857 тани ташкил қилган бўлса, 2020 йилда бу кўрсаткич 793 тани кўрсатган.
«Тан жароҳати билан боғлиқ йўл транспорт ҳодисалари 46 тага (616—570), ўлим билан боғлиқ йўл-транспорт ҳодисалари 18 тага (241—223) камайишига эришилган», — дейди Абдунаби Тўраев.
Таҳлилларга кўра, содир этилган йўл-транспорт ҳодисаларининг 339 таси пиёдаларни уриб юбориш, 241 таси тўқнашув, 52 таси ағдарилиш, 99 таси велосипедчини уриб юбориш, 44 таси бирор тўсиққа бориб урилиш, 13 таси бошқа турдаги йўл-транспорт ҳодисаларини ташкил этган.Йўл-транспорти ҳодисаларининг 97 таси соат 00:00 дан 08:00 гача, 289 таси соат 08:00 дан 16:00 гача, 402 таси соат 16:00 дан 24:00 гача бўлган вақт оралиғида содир этилганлиги қайд этилган.
Аниқланишича, 2020 йил давомида содир бўлган йўл транспорт ҳодисаларининг 235 таси белгиланган тезликка риоя қилмасдан транспорт воситасини бошқариш, 64 таси пиёдалар томонидан қоидабузарликлар содир этилиши, 22 таси маст ҳолда транспорт воситасини бошқариш, 56 таси йўналишни ўзгартириш, 44 таси оралиқ масофани сақламаслик, 39 таси чарчоқлик туфайли рулда ухлаб қолиш, 80 таси қарама-қарши йўналишга чиқиб кетиш оқибатида юзага келган.
Изоҳ (0)