Ўзбекистонда 1 мартдан бошлаб тадбиркорларга йўл ҳаракати бузилганини қайд этувчи фото-видео техник воситалар ўрнатиш ҳуқуқи берилади. Бу ҳақда ЙҲХББ бошлиғи ўринбосари Эрали Бозоров 14 январь куни ўтказилган матбуот анжуманида маълум қилди.
«Йўл ҳаракати хавфсизлигини таъминлаш мақсадида 2021 йил 1 мартдан бошлаб, тадбиркорлик субъектларига автомобиль йўлларида йўл ҳаракати бузилганини қайд этувчи махсус автоматлаштирилган фото ва видео дастурий техник воситалар ўрнатиш ҳуқуқи берилмоқда», — деган у.
Шунингдек, 2021 йил 1 мартдан бошлаб хусусий секторни катта ҳажмли вазн параметрини назорат қиладиган назорат постларини ўрнатишга жалб қилиш белгиланган.
Автомобиль йўллари қўмитаси масъул ходими Анвар Мусабековнинг айтишича, қўмита оғир ва габарит назорати бўйича станция шохобчаларини ўрнатиш бўйича изчил ишларни амалга ошириб бормоқда.
Эслатиб ўтамиз, 2020 йил декабрь ойида «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида»ги Президент қарори қабул қилинганди. Қарорга кўра, махсус автоматлаштирилган фото ва видео қайд этиш дастурий техник воситалари ўрнатиладиган жойларни тадбиркорларга бириктириш электрон аукцион савдолари орқали амалга оширилади.
Электрон аукцион савдоларида ғолиб бўлган тадбиркорларга бундай жойлар чекланмаган муддатга ва бошқа тадбиркорга ўтказиш ҳуқуқи билан бириктирилади. Шунга кўра, 2021—2022 йилларда республика бўйича жами 3356 та интеллектуал видеокамера ҳамда 763 та стационар радар ўрнатилади.
Аввалроқ Ўзбекистонда «парковка» қоидаларини бузганлик учун жарима миқдори қанчага пасайтирилаётгани маълум қилинганди.
Изоҳ (0)