General Motors концерни онлайн форматда ўтказилган CES электроника кўргазмаси доирасида келажакдаги премиум синфга оид шахсий транспорт воситаси қанақа кўринишга эга бўлиши борасидаги тасаввурлари билан бўлишди. Ихтирочилар Vertical Take-Off and Landing Drone дрони ва Cadillac’нинг Personal Autonomous Vehicle ер усти капсуласи ёрдамида ҳаракатланишни таклиф этмоқда, деб хабар беради Motor.
GM тасаввурига кўра, келажакда одамларнинг тўлиқ мобиллигини таъминлаш учун бирданига иккита транспорт воситаси керак бўлади. Керакли жойга анъанавий тепкилар ва руль бошқаруви бўлмаган тўлиқ автоном микроавтобус ёрдамида етиб бориш мумкин бўлади. Олд қисми ойнали панорамага эга капсула ноодатий панеллар тизими билан жиҳозланиб, у бир вақтнинг ўзида эшиклар вазифасини бажаради. Салонда қулайликни таъминлаш учун кузовнинг бир қисми четга силжийди, ён ойналари эса юқорига кўтарилади.
Микроавтобус интерьери ҳам футуристик усулда яратилган. Унинг ичида сенсор экранларга эга юмалоқ диван жойлашган. Бундан ташқари, машинанинг олд қисмида четлари эгилган улкан дисплей жойлашган, борт электроникаси эса йўловчиларнинг биометрик маълумотларини тўплашга қодир. Бу орқали у индивидуал контентни тақдим этади, шунингдек, салондаги микроиқлимни созлайди.
Ҳаракатланиш қийин бўлган ёки тирбандликлар вақтида Cadillac учадиган шахсий дрондан фойдаланишни таклиф этмоқда. Вертикал ҳолатда бир нафар йўловчи сиғадиган машина тўртта паррак билан жиҳозланган бўлиб, унинг тезлиги соатига 90 километрга етади. Атрофни томоша қилиш қулай бўлиши учун учар транспорт воситасининг олд қисми тўлиқ шаффоф бўлади, бироқ ер устидаги капсула каби уни ҳам қандай бошқарилиши ҳозирча номаълум.
Аввалроқ BMW’нинг келажакдаги моделлари йўлларни «ҳис қилишни» бошлаши тўғрисида хабар берилганди.
Изоҳ (0)