COVID-19 касаллигидан тузалган москваликлар учун эпидемия туфайли қўйилган чекловлар юмшатилади. Бу ҳақда шаҳар мэри Сергей Собянин «Россия 24» телеканалида маълум қилди, дея хабар бермоқда Meduza.
Унинг сўзларига кўра, агар бирор киши аллақачон касалликдан тузалган бўлса, унда «нега у уйда ўтириши керак?»
«Биз шифокорлар, мутахассислар, транспорт ходимлари, IТ-мутахассислар билан маслаҳатлашмоқдамиз ва (касалликдан тузалган москваликлар) шаҳар тизимида маълум имтиёзларга эга бўлишига имкон берадиган тизим яратмоқдамиз», – деди Собянин ва келаси ҳафта тафсилотларни айтиб беришни ваъда қилди.
Собянин Москва май ойида нормал ҳаётга қайтишига ишонади. Ушбу муддат, унинг фикрига кўра, «фуқароларнинг қанчалик фаол эмланишига» боғлиқ. Собяниннинг айтишича, 140 минг москвалик аллақачон коронавирусга қарши вакцинани қабул қилган.
Собянин январь ойининг охирига келиб Москвада COVID-19 билан касалланиш ҳолати камайишини кутмоқда. «Менинг ҳиссиётларимга кўра, январь ойида ҳақиқатан ҳам пасайиш бўлиши керак. Агар ҳозир бўлмаса, икки ёки уч ҳафта ичида бу содир бўлади», – деди шаҳар мэри.
Коронавирус бўйича оператив штабнинг 14 январь тонгида эълон қилган маълумотига кўра, Москвада сутка давомида 5893 та COVID-19 билан касалланиш ҳолати қайд этилган.
Аввалроқ Россияда COVID-19’нинг «британча» штаммини юқтириб олиш билан боғлиқ илк ҳолат аниқлангани ҳамда мамлакатда 18 январдан оммавий вакцинация бошланиши ҳақида хабар берилганди
Изоҳ (0)