Сўнгги йилларда иқлим ўзгариши оқибатида дунёнинг турли ҳудудларида озиқ-овқат нархлари кескин кўтарилмоқда. Бу ҳақда Барселона суперкомпьютер маркази таҳлилларига таяниб, Financial Times нашри хабар берди.
Масалан, Испанияда 2022–2023 йиллардаги қурғоқчилик Европада зайтун мойи нархининг 50 фоизга ошишига сабаб бўлган. Ҳиндистонда 2024 йилнинг май ойида иссиқ ҳаво тўлқинлари фонида пиёз нархи 89 фоизга, Жанубий Кореяда карам 70 фоизга, Японияда гуруч 48 фоизга, Хитойда эса сабзавотлар нархи 30 фоизга кўтарилган. Экспертлар экстремал об-ҳаво ҳодисалари аввалгига қараганда тез-тез ва кучлироқ рўй бераётганини таъкидламоқда.
Иссиқхона газлари камаймагунча бу вазият давом этади, дейди етакчи тадқиқотчи Максимилиан Коц.
Иқлимнинг ҳар қандай ўзгариши дунё бозорига бевосита таъсир қилади. Масалан, Гана ва Кот-дъИвуардаги қурғоқчилик сабабли какао дуккаклари уч баравар қимматлашди. Бу эса Буюк Британияда шоколад нархига таъсир кўрсатди. Тадқиқотчилар фикрича, озиқ-овқат нархининг бундай ошиши глобал инфляциянинг асосий омилларидан бирига айланган.
Бундай ҳолатлар илгари ҳам кузатилган: 2010 йилда Россиядаги аномал иссиқ ҳаво ёнғинларга сабаб бўлган. Бу буғдой нархининг кескин ошишига олиб келган. Оқибатда Россия экспортни тўхтатган, бу эса Мозамбик каби давлатларда нон бўйича норозилик намойишларига сабаб бўлган.
Чунки озиқ-овқат нархи — бу сиёсий масала. Ҳар доим шундай бўлган, дейди тадқиқотда иштирок этмаган Техас университети таҳлилчиси Раж Пател.
Мутахассислар Буюк Британия каби озиқ-овқат импортига қарам боғланган мамлакатлар энг кўп зарар кўришини прогноз қилмоқда.
Изоҳ (0)