Twitter раҳбари Жек Дорси 13 та твитдан иборат изоҳ ёзиб, унда АҚШнинг амалдаги президенти Дональд Трампнинг аккаунти блокланиши ҳақида фикр билдирди, деб хабар бермоқда Meduza.
Дорсининг таъкидлашича, Трампнинг аккаунти блокланиши тўғри қарор бўлди. Ижтимоий тармоқ буни ўз кучини жамоат хавфсизлигига қаратишга мажбур қилган фавқулодда вазиятда қабул қилди. «Онлайн айтилган гапнинг офлайнда келтириб чиқарувчи зарари яққол намоён», — деган Дорси.
Шу билан бирга, унинг фикрича, бундай ҳаракатлар жамиятни иккига бўлиб юборади. Шунингдек, корпорация ва алоҳида шахслар глобал жамоат мунозараси устидан қанчалик эгалик қилиши ҳақида ўйлашга мажбур қиладиган хавфли вазиятни юзага келтиради.
Дорси, шунингдек, бир вақтнинг ўзида бир нечта йирик ижтимоий тармоқларнинг Трампни блоклаш қарори олдиндан келишилмаганини билдирган. «Катта эҳтимол билан, компаниялар ўз хулосаларидан келиб чиқди ёки бошқаларнинг ҳаракатларидан илҳомланди», — деган Дорси.
Twitter раҳбари Трампнинг аккаунтини блоклашдан хурсанд эмаслигини, буни «соғлом мулоқот маданиятини тарғиб қилишдаги муваффақиятсизлигимиз белгиси эканлигидан далолат» деб билди.
Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.
Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлгани айтилмоқда.
Шундан сўнг Facebook ва Instagram Трампни 24 соатга, Twitter эса 12 соатга блоклаб қўйди. Кейинроқ Facebook ва Instagram ҳам Дональд Трамп аккаунтини президентлик муддати тугагунча блоклади.
Изоҳ (0)