Австралия ҳукумати 13 минг километр масофани босиб ўтиб, АҚШдан тасодифан мамлакатга етиб келган Жо исмли пойга каптарини эвтаназия – инфекция ёрдамида ўлдиришга қарор қилди, деб хабар бермоқда Associated Press’га таяниб «Интерфакс».
Таъкидланишича, расмий равишда қуш карантин чораларини бузувчи ҳисобланади. Каптарнинг материкка қандай етиб келгани аниқ эмас. Тахминларга кўра, у Тинч океани орқали юк кемасида сузиб ёки ўзи учиб келган бўлиши мумкин.
Каптар спорт қуши эканлиги маълум бўлган. У 29 октябрь куни АҚШнинг Орегон штатидаги пойгаларда қатнашган ва ғойиб бўлган. Қушни 26 декабрь куни Мельбурнда яшовчи Кевин Селли-Бёрд ўз томорқасидан топиб олган.
Кевин қушни озиқлантириб, унга сув берган. Кучга кирган қуш ўша пайтдан бери унга «ҳаёт бағишлаган» Селли-Бёрднинг томорқасида бошқа каптарлар билан яшамоқда.
«Менимча, у қолишга қарор қилди. Чунки мен уни озиқлантирдим, демак, бу унинг уйи», – деди Селли-Бёрд.
Селли-Бёрд каптарга АҚШда сайланган президент Жо Байденнинг шарафига Жо деб ном берган. Кейинчалик маълум бўлишича, Оклаҳома штатидаги пойга каптарлари иттифоқи қушнинг Алабама штатидаги Монтгомери шаҳрида рўйхатдан ўтганлигини тасдиқлади. Кевиннинг сўзларига кўра, у қуш эгаси билан боғланмоқчи бўлган, аммо ҳали бунга эришмаган.
Айни пайтда Австралия карантин ва инспекция хизмати қуш касаллик ташувчиси бўлиши мумкинлигидан хавотирда. Ҳокимият Кевиндан қушни тутишни сўраган. Кевин бу ишни қилолмагандан кейин карантин хизмати профессионал қуш тутувчилар хизматидан фойдаланишга қарор қилган.
Австралия қишлоқ хўжалиги вазирлиги каптарнинг мамлакатда озиқ-овқат хавфсизлиги ва ёввойи қушлар популяциясига таҳдид солиши мумкинлигини тушунтирди.
«Каптар Австралиядаги қушлар ва паррандалар учун тўғридан-тўғри биохавфни туғдиради», – дейилади вазирлик баёнотида.
Австралия миллий каптарлар ассоциацияси котиби Бред Тёрнер АҚШдан келган каптар экзотик касалликларга дучор бўлганлигидан қўрқишини яна бир бор таъкидлади ва Жо эвтаназия қилиниши кераклигига рози бўлди.
Аввалроқ эса Лос-Анжелес ҳайвонот боғидаги бир жуфт қари шер айрилиқда яшамаслиги учун бир вақтда заҳарлаб ўлдирилгани ҳамда Ван Дамм ҳужжатлари билан боғлиқ муаммо сабаб ўлдирилиши керак бўлган чихуахуанинг ҳаётини сақлаб қолгани ҳақида хабар берилганди.
Изоҳ (0)