Жанубий Корея 2045 йилгача Ойда базада қуришни режалаштирди. Бу ҳақда The Korea Times хабар беради.
Мамлакатнинг бу қарори коинотни ўрганиш бўйича узоқ муддатли миллий дастур доирасида амалга оширилмоқда. Корея аэрокосмик администрацияси (КАСА) Тежон шаҳридаги Корея миллий тадқиқот жамғармасида анжуман ўтказиб, унда мамлакатнинг коинотни ўрганиш режаларини оммага эълон қилган.
Унда айтилишича, Ер орбитаси, Ой, ҳелиосфера ва космос алоҳида-алоҳида тадқиқ қилинади. Ушбу тадқиқот доирасида 5 та миссия бажарилиши назарда тутилган. Хусусан, Ойда мустақил қўниш ва ҳаракатланиш технологияларини ривожлантириш, Ой ресурсларидан фойдаланиш ва иқтисодий фаолият учун инфратузилма қурилиши мақсад қилинган.
Таъкидланишича, 2040 йилгача логистика учун янги авлод Ойга қўниш қурилмаси ишлаб чиқариш режалаштирилган. 2045 йилга келиб эса Ой иқтисодий базасини қуриш мақсад қилинган. Қуёш ва гелиосферани ўрганиш қуёш фаоллигини кузатиш ва космик хавфсизликни оширишни кўзда тутади. Шунингдек, 2035 йилда Қуёш ва Ернинг тортишиш кучлари мувозанатлашган “Л4 Лагранж” нуқтасида қуёшни кузатувчи сунъий йўлдошни жойлаштириш режаси ҳам маълум қилинган.
Жанубий Корея космосни тадқиқ қилиш соҳасида сезиларли ютуқларга эришиб, глобал космик тадқиқотларда ўз ўрнини мустаҳкамлашга интилмоқда. Бу жараёнда Корея АэроКосмик тадқиқот институти (КАРИ) ва 2024 йилда ташкил этилган КАСА муҳим рол ўйнайди.
Изоҳ (0)