Россия 2020 йили Евросиё иқтисодий иттифоқида кузатувчи мақомини олган Ўзбекистон яқин истиқболда иттифоқнинг тўлақонли аъзоси бўлишига умид боғлаган. Бу ҳақда Россия бош вазири ўринбосари Алексей Оверчук Гайдар форумида маълум қилди, деб хабар беради «Интерфакс».
«Биз Ўзбекистонни иттифоқ аъзоси сифатида кўришга ишонамиз ва барча аъзолар бунда кўмак беради. Россия ҳам бу масалада Ўзбекистонга ёрдам беради», — дейди Оверчук.
2020 йил 11 декабрь куни бўлиб ўтган Евросиё иқтисодий иттифоқининг (ЕОИИ) видеоанжуман шаклидаги саммитида Ўзбекистон ва Кубага ташкилот ҳузуридаги кузатувчи давлат мақомини бериш тўғрисида қарор қабул қилинганди.
Эслатиб ўтамиз, Президент Шавкат Мирзиёев 2020 йил январда парламентга йўллаган Мурожаатномасида ушбу масала ҳукумат томонидан парламент муҳокамасига киритилиши ва халқ вакиллари билан батафсил кўриб чиқилишини маълум қилган эди. Март ойининг бошларида эса Ўзбекистон ЕОИИга кузатувчи-давлат мақомида қўшилиши маълум бўлганди. Май ойида Олий Мажлис Ўзбекистоннинг ЕОИИ фаолиятида кузатувчи давлат мақомида иштирок этиши тўғрисидаги таклифни маъқуллаганди. Овоз бериш жараёнида 100 нафар сенатордан 91 нафари иштирок этган. Улардан 71 нафари қарорни маъқуллаб овоз берган, 16 сенатор қарши чиққан, тўрт сенатор бетараф қолган.
Изоҳ (0)