Англия Премьер Лигаси – дунёнинг энг кучли футбол чемпионати сифатида қабул қилинади. Табиийки, у ерда дунёнинг энг яхши футболчилари жамланган, кучли рақобатда ютиб чиқиш эса ҳаммага ҳам насиб этавермайди. Шунинг учун туманли албиондаги футболчилар спорт формасини ушлаб туриш учун қўлидан келган барча ишни қилади. Боиси бир мартага мураббийнинг ишончи йўқотилса, уни қайта тиклаш деярли имконсиз. Афсуски, бундай ҳолатга тушиб қолганларнинг сони кам эмас. Қуйида айнан ана шундай мураббийнинг ишончини йўқотган ва АПЛни тарк этиши тобора ойдинлашаётган таниқли футболчилар ҳақида фикр юритилади.
Кепа Аррисабалага («Челси»), клуб билан шартномаси 2025 йилгача мўлжалланган
Рўйхатни Кепадан бошламаслик шунчаки кулгили бўларди, боиси дунёнинг энг қиммат посбони ўз дарвозаси томон йўлланган зарбаларнинг деярли барчасини ўтказиб юборади. Дарвозабон ўтган мавсумда йўлланган зарбаларнинг атиги 53,6 фоизини бартараф этишга муваффақ бўлган, бу исталган голкипер учун даҳшатли кўрсаткичдир. Жамоага янги қўшилган Эдуард Менди уни шунчаки захирага михлаб қўйди. Фрэнк Лэмпард Кепага шу даражада ишонмайдики, агар Менди жароҳат олса ёки дисквалификация қилинса ҳам, унинг ўрнига испанияликни эмас, балки 39 ёшли Вилли Кабальеро ёки фаолиятини тиклаган 38 ёшли Петр Чехни майдонга туширади.
Маркос Алонсо («Челси»), клуб билан шартномаси 2023 йилгача мўлжалланган
Икки йил олдин Transfermarkt ҳимоячининг нархини 45 миллион еврога баҳолаган эди, ҳозир эса бу кўрсаткич 13 миллион еврога тенг. Бунга Алонсонинг нақ 14 турдан бери ҳатто захира ўриндиғидан ҳам жой ололмаётгани изоҳ бўлиши мумкин. Натижада, «Реал» тарбияланувчиси ҳозирда «Атлетико»га кетиш ҳақида ўйламоқда.
Александр Зинченко («Манчестер Сити»), клуб билан шартномаси 2024 йилгача мўлжалланган
Ўтган мавсумда кутилган ўйинни намойиш эта олмаган Зинченко 2020/21 йилги биринчиликда ҳам айтарли имкониятларга эга бўлмаяпти, майдонга тушса ҳам кўпроқ хатолари билан ёдда қолмоқда. Гвардиола эса унинг ўрнига Бенжамин Менди ёки Жоау Канселони маъқул кўрмоқда.
Жердан Шакири («Ливерпуль»), клуб билан шартномаси 2023 йилгача мўлжалланган
Шакири майдонга тушиши учун жамоанинг юлдузлари қаторасига сафдан чиқиши лозим. Ноябрь—декабрь ойларида «Ливерпуль» жароҳатлар исканжасида қолганида ҳам Шакири асосий таркибдан жой ололмади. Ўтган мавсумда у АПЛда икки марта асосий таркибда майдонга тушган бўлса, ушбу мавсумда бирорта ўйинни илк дақиқалардан бошламади. «Ливерпуль»да асосий ҳужум учлиги аллақачон шаклланиб бўлган: Мане—Фирмино—Салоҳ, шунингдек, триодан асло қолишмайдиган Диогу Жота ҳам ўз вақтини кутишга мажбур. Шакирига эса шунчаки майдонда жой йўқ.
Деле Алли («Тоттенҳэм»), клуб билан шартномаси 2024 йилда ўз ниҳоясига етади
Алли Моуриньо «Тоттенҳэм»га келганида жуда яхши натижаларга эришганди, аммо кейинчалик у захира ўйинчисига айланиб қолди. 2020 йилнинг сентябрь ойида «Тоттенҳэм» ҳақида ҳужжатли фильм эфирга чиқди. Эпизодларнинг бирида эса Моуриньонинг Деле Аллига мактаб ўқувчисига бўлгани каби танбеҳ бераётгани акс эттирилди. Худди ўша сентябрдан кейин Деле Алли Премьер Лига ўйинларини бирор марта ҳам асосий таркибда бошламади. Ҳатто Моуриньо уни омма олдида танқид қилган вазиятлар ҳам кузатилди.
Донни ван де Бек («Манчестер Юнайтед»), клуб билан шартномаси 2025 йилгача мўлжалланган
2019 йилда Чемпионлар Лигаси ярим финалига чиққан «Аякс» кўпчиликнинг ёдида бўлса керак. Ушбу таркибдан «Барселона» де Йонгни, «Ювентус» де Лигтни, «Челси» Зиёшни, «Манчестер Юнайтед» эса ван де Бекни сотиб олди. Сўнгги трансфер ғалатироқ бўлиб чиқди, чунки Сульшер ўзи сотиб олган футболчини захирага ўтқазиб қўйди. Нидерландиялик футболчи Премьер Лигадаги дебют учрашувида гол ҳам урганди, бироқ шундан сўнг у ғойиб бўлди, қўйди. Бугунги кунга қадар ярим ҳимоячи Премьер Лиганинг фақат битта учрашувини асосий таркибда бошлади. Қизиқ ҳолат, нақ 39 миллион еврога харид қилинган футболчи деярли имконият берилмай, захира футболчисига айлантирилди.
Жессе Лингард («Манчестер Юнайтед»), клуб билан шартномаси 2022 йилгача мўлжалланган
Агар ван де Бек захирадан бўлса-да, бир қанча ўйинларда майдонга тушган бўлса, Лингард тамомила ҳисобдан чиқарилди. У АПЛнинг 2020/21 йилги мавсумида бирорта ўйин ўтказмади ва фақатгина 4 марта қайдномага киритилди. Ҳозирда унинг «Реал Сосьедад», «Зенит», «Шеффилд» ёки «Порту»га ўтиши мумкинлиги ҳақида хабарлар юрибди.
Шкодран Мустафи («Арсенал»), клуб билан шартномаси 2021 йилнинг ёзигача мўлжалланган
Жаҳон чемпионинг аҳволига ҳавас қилиб бўлмайди. Германияликнинг клубда ҳисобда нечанчи марказий ҳимоячи эканлигини айтиш мушкул. Премьер Лиганинг ушбу мавсумидаги ўйин вақти инобатга олинса, қуйидагича жадвал юзага келади:
- Ҳолдинг (1214 дақиқа)
- Габриэль (1052 дақиқа)
- Давид Луис (481 дақиқа)
- Пабло Мари (270 дақиқа)
- Колашинас (90 дақиқа)
- Мустафи (44 дақиқа).
Бир ярим йил олдин «Арсенал»га 79 миллион еврога тушган (клуб тарихидаги рекорд трансфер) футболчи ҳозирда жамоага бир миллионлик ҳам фойда келтиргани йўқ. Футболчига кўп маротаба имконият берилган, аммо у булардан фойдалана олмаган. «Арсенал»нинг ҳозирги мураббийи Артета эса футболчилар билан ортиқча пачакилашиб ўтирадиганлардан эмас. Факт ўрнида шуни айтиш керакки, Пепе кетма-кет уч марта асосий таркибда майдонга тушган ўйинда «Арсенал» ғалаба қозона олмади, шундан сўнг футболчи уч бор захирада қолдирилди – клуб эса айнан шу учрашувларда ғалабани тантана қилди.
Мавзуга доир: Ўзил, Обамеянг , Санчес ва бошқалар. «Арсенал» тарихидаги энг қиммат трансферлар ҳақида
Ўзилнинг «Арсенал»дан кетиши мавзуси қанчалик эскирган бўлмасин, усиз ушбу рўйхат тўлиқ бўлмасди. Арсен Венгер билан илиқ муносабатларга эга бўлган Ўзил айнан унинг истаги туфайли «тўпчилар» билан шартномани узайтирганди. Бироқ орадан 50 кун ўтиб, Венгер жамоадан кетишини эълон қилди. Ундан кейин келган мураббийларга эса (Эмери ва Артета) ярим ҳимоячи керак бўлмай қолди. Инглиз матбуоти эса тез-тез Ўзилнинг маошига (ҳафтасига 350 минг фунт) тўхталиб туради. Месутнинг ўзи жамоага ёрдам беришни исташини ва унга имконият берилмаётганидан нолиса, Артета унда етарлича вақт бўлганини, бироқ Ўзилнинг бундан фойдалана олмаганини таъкидлайди.
Изоҳ (0)