SpaceX космик компанияси асосчиси ва Tesla’нинг бош директори Илон Маск Forbes реал вақтда янгиланиб борувчи Real-Time маълумотларига кўра дунёнинг энг бой одами мақомидан маҳрум бўлди.
Америка фонд биржаларида савдолар якунига кўра Илон Маскнинг бойлиги 176,2 миллиард долларга баҳоланди, кун давомида у 13,5 миллиард долларга ёки 7,1 фоизга камайди. Рейтингда биринчи ўринни Amazon асосчиси Жефф Безос эгаллади. Унинг бойлиги 182,2 миллиард долларни ташкил этади. Йил давомида у 3,6 миллиард долларга ёки 1,96 фоизга камайди.
Маск 7 январь куни Безосни ортда қолдириб, дунёдаги энг бой бизнесменга айланганди. Ўша куни унинг бойлиги 9 миллиард долларга ўсиб, 186,5 миллиард долларни ташкил этди. Bloomberg Billionaires Index (BBI) маълумотларига кўра, 10 январь куни Маскнинг бойлиги 200 миллиард доллардан ошди. Ҳозирда BBI Маскнинг бойлигини 194 миллиард долларга баҳоламоқда. Бизнесмен ҳали ҳам энг бой одамлар рўйхатида биринчи ўринни эгалламоқда.
Маск дунёдаги энг бой одамлар рўйхатида Безосни ортда қолдиргандан сўнг, у ўзининг Twitter’даги саҳифасида маҳкамланган постни ўзгартириб, 2018 йилда ўз бойлигининг ярмини Марсда шаҳар қуришга йўналтиришга ваъда берган постини қайта жойлаган. Маскнинг ўзи Марсни мустамлака қилиш учун барча мол-мулкини сотишга қарор қилганини айтган. «Аслида, менда компаниянинг акцияларидан ташқари пул қийматидаги мулким деярли қолмайди», — деган у. Аввалроқ Маск 2050 йилга қадар Марсда 1 миллион аҳолиси бўлган шаҳар қуришни режалаштирганини айтганди.
2020 йил бошларида Маскнинг бойлиги тахминан 27 миллиард долларга баҳоланганди. Сўнгги бир йил ичида бизнесменнинг бойлиги кескин ўсди. Ўсишнинг асосий қисми, 700 фоиздан кўпроғини Tesla акциялари ҳисобига бўлган. 21 декабрь куни у S&P 500 индексига киритилди.
Безос 2017 йилдан бери сайёрадаги энг бой одам мақомини сақлаб турди. Forbes ҳисоб-китобига кўра, 2020 йилда у ўз капиталини 67,5 миллиард долларга кўпайтириб,182 миллиард долларга етказди.
Изоҳ (0)