Ўзбекистон ва Россия олимлари коронавирус ва унинг мутацияларини радиация (нурланиш)нинг кучсиз дозалари билан йўқ қилиш мумкинлигини аниқлади, деб хабар беради «Коммерсантъ». Таъкидланишича, вирусни йўқ қилишда қўлланадиган дозадаги радиация одам учун хавфсиз ҳисобланади.
Радиациянинг коронавирусга таъсирини ўрганиш билан Ўзбекистон Фанлар академияси ва Урал федерал университети олимлари шуғулланяпти. Ҳозирда улар даволаш методикасини ишлаб чиқмоқда.
«Бу ғоянинг моҳияти шундан иборатки, коронавируснинг РНК молекуласи одам ҳужайрасига тушганда ўз узунлиги бўйлаб кўплаб қисмларида кучли деформацияланади. Аниқланишича, вируснинг РНК молекуласи бўйлаб деформацияланган жойлари соғлом ҳужайралардан кўра радиация таъсирига минг маротаба таъсирчан экан. Бунда радиациянинг вирус учун ҳалокатли кучсиз дозалари одам ҳужайраларига мутлақ хавфсиз экани келиб чиқади», — дейди УрФУ профессори Анатолий Зацепин.
Мутахассисларнинг таъкидлашича, радиация таъсирида нафақат коронавирусни, балки бошқа вирусларни ҳам йўқ қилиш мумкин. Олимлар радиация ёрдамида, шунингдек, турли сиртларни дезинфекциялашни таклиф қилмоқда.
Бироқ россиялик вирусолог, тиббиёт фанлари доктори Анатолий Альтштейннинг таъкидлашича, коронавирусни радиация билан даволаш хавфли бўлиши мумкин.
«Одамни радиация билан даволаш керак эмас. Бундан ташқари, радиация турли бўлади. Рентген ва ультрабинафша нурланиш орасида катта фарқ бор», — дейди мутахассис. Унинг таъкидлашича, агар беморга унда коронавирусни ўлдира оладиган дозада рентген нурланиш берилса, аксинча, унга зиён етказиб қўйиш ҳам мумкин.
«Сиртларни нурлантиришга келсак, марҳамат, бу яхши дезинфекциядир. Ҳавода ультрабинафша нурланиш билан вируслар ўлдирилади», — дея таъкидлайди олим.
Эслатиб ўтамиз, 2020 йил майида ўзбекистонлик олимлар коронавирусга чалинганлар генидаги ДНК кетма-кетлигини аниқлаган эди.
Изоҳ (0)