«Реал» бош мураббийи Зинедин Зидан Ла Лига 18-тури доирасида 9 январь куни «Осасуна»га қарши кечган баҳсдан (0:0) кейин ўз фикрлари билан ўртоқлашди.
«Биринчи бўлимда ўйинимиз ўхшамади. Бундай майдонда қўлдан келганча ҳаракат қилдик. Бу футбол эмас. Мадридга қачон қайтиб кета олишимизни билмайман.
Ўйинни бекор қилиш керак эди, бироқ бу энди ортда қолди. Бундай шароитда ўйнаб бўлмайди», — дейди Зидан.
Учрашув давомида тинимсиз қор ёғди. Айни вақтда Испаниянинг турли жойларида кучли қор бўронлари кузатилмоқда. Аввалроқ Мадридда тревоганинг қизил даражаси эълон қилингани хабар қилинганди.
Қайд этиш жоиз, «Реал» Ла Лигада октябрь ойидан кейин илк бор гол ура олмади. Сўнгги бор мадридликлар 17 октябрь куни «Кадис» дарвозасига йўл топа олмаганди. Шунингдек, «Реал» мавсумда илк бор биринчи бўлимда рақиб дарвозаси томон аниқ зарба йўллай олмади.«Реал» 37 очко билан мусобақа жадвалида 2-ўринда бормоқда ва пешқадам «Атлетико»дан бир очко ортда қолган. Бироқ «матрасчилар»да учта захира ўйини мавжуд.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)