Namanganda mahalliy va xorij oliy ta’lim muassasalarida tahsil olayotgan 35 nafar talabaning bir yillik to‘lov-shartnoma pullari to‘lab berildi. Bu haqda “Daryo” muxbiri Azizbek Abduvaliyev xabar bermoqda.
Buning uchun maxsus tashkil etilgan komissiya tomonidan tibbiyot yo‘nalishida o‘qiyotgan talabalar saralab olindi. Ular orasida Rossiyaning Sankt-Peterburg, Uzoq Sharq, Volgograd, Voronej, Smolensk, Irkutsk tibbiyot universitetlari, shuningdek, Toshkent tibbiyot akademiyasi, Andijon va Samarqand tibbiyot institutlarida tahsil olayotgan yigit-qizlar bor.
“Oldinlari tumanda rahbar bo‘lib ishlaganimda bitta binoni ta’mirlashga 50 million so‘m ajratilishi uchun yil davomida sarson bo‘lganimni eslayman. Hozir xorijda o‘qiyotgan bir talabamizning yillik to‘lov-shartnoma puli uchun deyarli shunga yaqin mablag‘ to‘lab beryapmiz. Davlat rahbari yoshlar bilan uchrashuvda iqtidorli yigit-qizlarni rag‘batlantirish bo‘yicha bergan ko‘rsatmalari bunga asos bo‘lib xizmat qildi”, — deydi viloyat hokimi Shavkatjon Abdurazzoqov.
Viloyat budjetining qo‘shimcha daromadlari hisobidan bu maqsadlar uchun jami 470 million so‘m ajratildi. Hozirda tanlov komissiyasi yana 35 nafar namanganlik talabaning hujjatlarini o‘rganmoqda. Ular orasida nafaqat tibbiyot, balki viloyatda ehtiyoj yuqori bo‘lgan boshqa yo‘nalishlar ham bor.
Talabalarga to‘lov-shartnoma pullari ajratilganini tasdiqlovchi sertifikatlarni topshirish marosimida bosh vazir o‘rinbosari Behzod Musayev ishtirok etdi.
Izoh (0)