АҚШ Украинага хавфсизлик кафолатларини тақдим этиш доирасида у ерда қўшин жойлаштиришни режалаштирмаяпти. Бу ҳақда Оқ уй матбуот котиби Керолин Ливитт маълум қилди.
“Президент АҚШ ҳарбий хизматчиларининг Украина ҳудудида бўлмаслиги ҳақида аниқ фикр билдирди. Бироқ, биз, шубҳасиз, Европадаги иттифоқчиларимиз билан мувофиқлаштириш ишларида ёрдам беришимиз ва эҳтимол, хавфсизликни таъминлашнинг бошқа чораларини таклиф этишимиз мумкин”, деди у журналистлар учун доимий брифингда.
Шу билан бирга, у Вашингтон хавфсизлик кафолати сифатида Украинани ҳаво орқали қўллаб-қувватлаш имкониятини рад этмаслигини таъкидлаган.
“Президент мустаҳкам тинчлик ўрнатиш учун хавфсизлик кафолатлари жуда муҳимлигини англаб етди ва миллий хавфсизлик бўйича жамоасига европалик ҳамкорларимиз билан ҳаракатларни мувофиқлаштириш, шунингдек, Украина ва Россия билан ҳамкорликни давом эттириш ҳамда бу масалаларни муҳокама қилиш бўйича кўрсатма берди. Бу вариантлардан ва имкониятлардан биридир. Мен, албатта, президент ихтиёрида бўлган ҳарбий вариантлар борасида ҳеч нарсани истисно қилмаган бўлардим”, деди Ливитт.
Бундан аввал АҚШ президенти Дональд Трамп Қримни Украинага қайтаришнинг иложи йўқлигини айтди. У мамлакатнинг НАТОга қўшилиш эҳтимолини ҳам инкор этганди.
18 август куни кечқурун Трамп Зеленский ва Европа етакчилари билан музокаралар ўтказди. Очиқ қисм ярим соатдан сал камроқ давом этди. Музокараларда НАТО бош котиби Марк Рютте, Еврокомиссия раҳбари Урсула фон дер Ляйен, Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Финляндия президенти Александр Стубб, Италия бош вазири Жорж Мелони иштирок этди.
Трампнинг ўзи учрашувни “жуда самарали” деб атади. Унинг сўзларига кўра, томонлар АҚШ билан келишилган ҳолда Европанинг турли давлатлари томонидан тақдим этиладиган Украина учун хавфсизлик кафолатларини муҳокама қилган.
Изоҳ (0)