Ўзбекистонда юзага келган совуқ об-ҳаво сабаб Тошкент вилоятидаги «Туябўғиз» сув омборининг юзаси музлади. Бу ҳақда Миллий олимпия қўмитаси хабар берди.
Маълум қилинишича, сув омборининг юзаси музлагани сабабли ушбу масканда шуғулланаётган эшкак эшувчилар сувда машғулот ўтказа олмаяпти.
«Бироқ янги мавсумда ўз олдига жиддий мақсад қўйган спортчиларимиз машғулотларни тренажёр залида давом эттиришмоқда. Айни дамда ушбу базада академик эшкак эшувчиларимизнинг тўлиқ таркиби, шунингдек, байдарка ва каноэчиларимизнинг маълум қисми машғулот олиб боришмоқда», — дейилади хабарда.
Ижтимоий тармоқларда музлаб қолган сув омоборининг видеоси ҳам тарқалди:
Маълумот учун, «Туябўғиз» сув омбори («Тошкент денгизи») Оҳангарон дарёсининг ўрта оқимида барпо этилган гидротехника иншооти саналади. Иншоот 1962 йилда қурилган ва дарё сувини мавсумий тартибга солади. Умумий ҳажми 250 миллион кубометр, фойдали ҳажми 224 миллион кубометрни ташкил этади. Сув юзаси майдони 20 квадрат километр, ўртача чуқурлиги — 12,5 метр.
«Туябўғиз» сув омбори тўғонининг узунлиги 2,4 километр, икки чеккаси қумоқ тупроқдан қурилган. Тўғон устидан Тошкент—Бекобод автомобиль йўли ўтади. Сув омбори атрофида дам олиш зонаси ташкил этилган.
Аввалроқ Ўзбекистонда сўнгги 10 кундан бери кузатилаётган аномал совуқ 9—12 январдан бошлаб чекина бошлаши маълум қилинганди.
Изоҳ (0)