O‘zbekistonda yuzaga kelgan sovuq ob-havo sabab Toshkent viloyatidagi “Tuyabo‘g‘iz” suv omborining yuzasi muzladi. Bu haqda Milliy olimpiya qo‘mitasi xabar berdi.
Ma’lum qilinishicha, suv omborining yuzasi muzlagani sababli ushbu maskanda shug‘ullanayotgan eshkak eshuvchilar suvda mashg‘ulot o‘tkaza olmayapti.
“Biroq yangi mavsumda o‘z oldiga jiddiy maqsad qo‘ygan sportchilarimiz mashg‘ulotlarni trenajyor zalida davom ettirishmoqda. Ayni damda ushbu bazada akademik eshkak eshuvchilarimizning to‘liq tarkibi, shuningdek, baydarka va kanoechilarimizning ma’lum qismi mashg‘ulot olib borishmoqda”, — deyiladi xabarda.
Ijtimoiy tarmoqlarda muzlab qolgan suv omoborining videosi ham tarqaldi:
Ma’lumot uchun, “Tuyabo‘g‘iz” suv ombori (“Toshkent dengizi”) Ohangaron daryosining o‘rta oqimida barpo etilgan gidrotexnika inshooti sanaladi. Inshoot 1962-yilda qurilgan va daryo suvini mavsumiy tartibga soladi. Umumiy hajmi 250 million kubometr, foydali hajmi 224 million kubometrni tashkil etadi. Suv yuzasi maydoni 20 kvadrat kilometr, o‘rtacha chuqurligi — 12,5 metr.
“Tuyabo‘g‘iz” suv ombori to‘g‘onining uzunligi 2,4 kilometr, ikki chekkasi qumoq tuproqdan qurilgan. To‘g‘on ustidan Toshkent—Bekobod avtomobil yo‘li o‘tadi. Suv ombori atrofida dam olish zonasi tashkil etilgan.
Avvalroq O‘zbekistonda so‘nggi 10 kundan beri kuzatilayotgan anomal sovuq 9—12-yanvardan boshlab chekina boshlashi ma’lum qilingandi.
Izoh (0)