Тошкент—Термиз халқаро М39 автомобиль йўлининг Деҳқонобод тумани ҳудудидан ўтувчи 13 километри қурилиши маблағ қурувчилар томонидан талон-торож қилингани боис, тўхтаб қолган. Бу ҳақда вилоят Автомобильлар йўллари бош бошқармаси масъуллари иштирокида бўлиб ўтган матбуот анжуманида маълум қилинди, дея хабар берди «Дарё» мухбири.
Матбуот анжуманида айтилишича, М39 халқаро автомобиль йўлининг 60 километри Деҳқонобод тумани ҳудудидан ўтган бўлиб, бундан икки йил аввал автомобиль йўлини туман марказига кирмай давом эттирувчи 13 километр қисмини қуриш ишлари бошланган ва қурилиш ишларига 120 миллиард сўм ажратилган.
«Бироқ, қурувчилар йўл учун ажратилган 120 миллиард сўмнинг атиги 30 фоизини йўлга сарфлаган ва қурилиш ишлари якунига етмай қолган. Шу боис, ушбу ишга масъул бўлган иккита қурилиш ташкилоти масъуллари жавобгарликка ҳам тортилган», — деди вилоят Автомобиль йўллари бош бошқармаси бош муҳандиси Бўри Файзиев.
Бўри Файзиевнинг аниқлик киритишича, халқаро йўлнинг Деҳқонобод тумани марказидан ўтувчи 13 километрини қуриш Тошкент шаҳридаги қурилиш ташкилотларига берилган бўлиб, иш ҳозиргача чала қолган.
Масъулнинг қўшимча маълумот беришича, М39 халқаро автомобиль йўлининг 1240-километри Ғузор тумани ҳудудидан бошланиб, 1315-километри Сурхондарё вилояти чегарасида тўхтайди ва умумий узунлик 75 километрни ташкил қилади. Шу пайтга қадар ушбу йўлнинг 21 километри таъмирланган.
Эслатиб ўтамиз, бундан аввал Олий Мажлис депутати, Қонунчилик палатаси Спикери ўринбосари Актам Ҳайитов республика бюджетидан йўл таъмири учун берилган маблағнинг 180 миллиард сўми белгиланган муддатда сарфланмай қолганини, Қашқадарё вилоятининг Деҳқонобод тумани марказига олиб кирувчи М39 халқаро йўли эса таъмирталаблигича қолаётганини маълум қилгани ҳақида хабар берилганди.
Изоҳ (0)