Жеймс Бонднинг маъшуқаси ролини ижро этган актриса Таня Робертс вафот этди. Актрисанинг яқинлари хатолик сабаб унинг ўлимини бир кун олдин эълон қилган

Америкалик актриса ва модель Таня Робертс 5 январь тонгида Лос-Анжелесдаги шифохонада вафот этди. Бу ҳақда актрисани даволаган шифокорга таяниб, TMZ хабар берди.

TMZ ва бошқа ОАВлар хатолик сабаб Робертснинг агенти Майкл Пингелга таяниб, унинг ўлганини 4 январь куни ёзганди. Бироқ орадан бир неча соат ўтгач, Пингел ушбу маълумотни рад этган. У содир бўлган воқеани актрисанинг дўсти, О’Брайен билан «тушунмовчилик» деб изоҳлаган.

O’Брайеннинг Page Six нашрига маълум қилишича, у Пингелга Роберц ётган касалхонага ташриф буюргани ва «Таня билан видолашиб, унинг ажойиб кўзларини сўнгги бор кўрганини» айтган. Пингел эса бу сўзларни Робертснинг ўлими сифатида қабул қилган. ЎБраеннинг қўшимча қилишича, у ҳам Робертсни ўлган деб ўйлаб, касалхонадан шифокорлар билан гаплашмай чиқиб кетган. Актрисанинг ўлими ҳақидаги хабарлар ОАВда тарқалгач, тиббиёт ходимлари у билан боғланиб, Танянинг тириклигини айтган.

65 ёшли Таня Робертс 24 декабрь куни шифохонага ётқизилган эди. ЎБраеннинг сўзларига кўра, унга сийдик йўли инфекцияси ташхиси қўйилган. У оғир аҳволда бўлгани айтилмоқда.

Таня Робертс 1985 йилда экранларга чиққан «A view to a kill» (Жеймс Бонд ҳақидаги) фильмида суратга тушган. Шунингдек, у «Бармоқлар» (1978 йил), «Шина — жунгли қироличаси» (1984 йил) фильмлари, «70 йиллар шоуси» (1998—2006) сериалидаги роллари билан машҳурликка эришган эди.

Эслатиб ўтамиз, 2020 йилнинг октябрида Жеймс Бонд роли билан машҳурликка эришган Шон Коннери 90 ёшида вафот этганди.