Нью-Йорк авиадиспетчерларига ўтган йили Эрон генерали Қосим Сулаймоний ўлдирилганига қасос тариқасида АҚШ пойтахтида теракт уюштирилиши ҳақида таҳдидли хабар келди. Бу ҳақда ушбу таҳдид айтилган аудиоёзувга эга CBS Nеws телеканалига таяниб Meduza хабар берди.
АҚШ авиадиспетчерлари частотасида 4 январь куни янграган хабарда қуйидагилар айтилган: «Биз чоршанба куни Капитолийга самолёт йўналтирамиз. Сулаймоний учун қасос олинади».
CBS маълумотларига кўра, АҚШ ҳукумати ушбу таҳдидни ҳақиқий деб ҳисобламайди, аммо авиация частоталарига ноқонуний кирилиши юзасидан текширув ўтказмоқда. Шунингдек, барча назоратчилар самолётлар ўз йўналишларидан ҳар қандай оғиши ҳақида зудлик билан хабар бериши кераклиги эслатилган.
Телеканал манбаларининг фикрича, хабарда эълон қилинган 6 январь санаси тасодифан танланмаган — шу куни Капитолийда Сенат ва Вакиллар палатаси аъзоларининг қўшма йиғилиши бўлиб ўтади, унда АҚШ президент сайловлари натижалари тасдиқланади.
Аввалроқ Эрон Сулаймонийнинг ўлими учун АҚШдан қасос олиш ҳали якунланмаганини эслатиб ўтгани ҳақида хабар берилган эди. «Ал-Қудс» командири ўринбосари генерал Муҳаммад Хежази «Бу шунчаки юзга тарсаки тортишдек гап эди, ҳақиқий қасос ҳали олдинда», деб айтган.
Эслатиб ўтамиз, Эрон Ислом инқилоби муҳофизлари корпуси (ИИМК) генерали Қосим Сулаймоний 2020 йил 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган.
У ИИМКни террорчилик ташкилоти деб ҳисоблаган ва Қосим Сулаймонийни минтақада, хусусан, Ироқда бўлиб турган америкалик дипломатлар ва ҳарбийларга ҳужум қилишни режалаштирганликда айблаган. Эрон эса унга жавобан Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланганди.
Изоҳ (0)