Тожикистоннинг кўп қаватли бинолари бўлмаган қишлоқ жойларига электр энергияси таъминотида 5 январдан чеклов жорий қилинди. Аҳоли уйларида соат 23:00 дан 06:00 гача «свет» бўлмайди, деб хабар бермоқда Asia-Plus.
Нашрнинг ҳукуматдаги манбаси Нурек ГЭС сув омборидаги сув сатҳи 2020 йилнинг шу даврига нисбатан 4 метрга паст бўлганлиги сабабли шундай қарор қабул қилинганини маълум қилган.
Ушбу чеклов қачонгача амал қилиши номаълум. Манба, шунингдек, Тожикистон қўшни мамлакатларга электр энергияси экспорт қилмаётганини билдирган.
Қайд этилишича, кузда мамлакатнинг қишлоқ ва вилоятлари аҳолиси электр энергияси тез-тез ва узоқ вақт узилишлардан шикоят қилган: уларга суткасига 4—6 соат электр энергияси берилган.
10 декабрдан бошлаб Тожикистоннинг барча қишлоқ, туман, шаҳарлари бир неча соатлик узилишлар бўлган алоҳида ҳолатларни ҳисобга олмаганда, узлуксиз ва тун-у кун электр энергияси билан таъминланган.
Бироқ экспертларнинг маълум қилишича, Тожикистоннинг сув-энергетика ресурслари баҳор—ёз мавсумига қадар ушлаб туриш учун етарли эмас ва чекловлар жорий этилиши эҳтимоли мавжуд.
Агар Нурек ГЭС сув омборини сув билан тўлдириш билан боғлиқ вазият ёмонлашишда давом этса, шаҳар маъмурияти 5 январдан жорий этилган чеклов бутун мамлакат бўйлаб, ҳаттоки Душанбегача кучайтирилишини кутиш мумкинлигини қайд этган.
5 январь куни Марказий Осиё ва Қозоғистонни боғлайдиган ягона энергия тизимининг электр узатиш тармоқларида режадан ташқари узилишлар юз берди. Шу сабабли Ўзбекистондаги иссиқлик электр станцияларида аварияга қарши автоматика ишга тушиб кетган. Мамлакат Энергетика вазирлиги электр энергиясида қисқа муддатли узилишлар бўлиши ҳақида огоҳлантирди.
Изоҳ (0)