2019/20 йилги мавсумни Олмалиқнинг ОКМК клубида ўтказган ҳимоячи Акмал Шораҳмедов «Sports.uz» билан суҳбатда ЖЧ—2014 мусобақаси саралаш босқичидан ўрин олган Жанубий Кореяга қарши ўйиндаги автоголи ҳақида гапирди.
Футболчи ва спортчилар руҳий томондан кучли бўлиши керак. Масалан, «Пахтакор» футболчиси «Навбаҳор» мухлисларига ёқмаслиги мумкин, «Навбаҳор» ўйинчиси эса «Пахтакор» ёки «Андижон» ишқибозига ёқмаслиги мумкин. Бу одатий ҳол, ҳар доим кимгадир ёқасан ёки аксинча. Ўша голга келсак, бу футболда учраб турадиган ҳолат. Ҳар ўйинда кимдир кимгадир гол уради. Ўша пайтни эсласак, тўп оширилганида бошимни олиб қочмайман-ку, ортимдаги рақиб гол уриши учун. Ҳар қандай ҳимоячи ҳар бир вазиятда тўпни чиқариб юборишга ҳаракат қилади.Ўзбекистон терма жамоаси 2014 йилги Жаҳон Чемпионати саралашининг 4-босқичида Эрон, Жанубий Корея, Қатар ва Ливан жамоалари билан бирга А гуруҳидан жой олади ва якунда 3-ўрин билан гуруҳда қолиб кетади. Иккинчи ўринни эгаллаган Жанубий Корея ва Ўзбекистон жамоаларининг очколари тенг бўлса-да, тўплар нисбати туфайли мундиал йўлланмаси корейсларга насиб этади. Миржалол Қосимов бошчилигидаги жамоага атиги битта тўп фарқи етмайди.Шу каби ҳолатларда эса тўп кутилмаганда ўз дарвозасига кириб кетиши мумкин. Агар ўшанда тўп узатилганида мен бошимни олиб қочсам, буни одамлар қандай тушунишарди? Тўпдан ўзимни олиб қочдим ҳам дейлик, аммо рақиб барибир гол уриб кетади, ахир бу бир хил ҳолат-ку. Шунинг учун футболни тушунадиган одамлар бу ҳақида бир марта ҳам гапиришмайди. Ниманидир сабаб қиладиганлар эса доим гапираверади. Ютқазса ҳакам ёки бошқаси айбдор бўлади.
Биз ўшанда Тожикистон ёки Туркманистонга эмас, Жанубий Корея майдонида ютқаздик. Корея ўйинчилари эса ҳар томонлама Ўзбекистон чемпионати вакилларидан кучлироқ. Мана, Олег Зотеевдан (Зотеев Кореянинг қуйи лигасида иштирок этадиган «Чоннам» клуби сафида тўп суради — «Дарё») Жанубий Корея биринчи лигасининг савиясини сўрасангиз қанақа фарқ қилишини айтиб беради.
Акмал Шорахмедов, футболчи
Маълумот учун, Акмал Шораҳмедов ОКМКдан ташқари «Бунёдкор», «Насаф» ва «Пахтакор» каби жамоаларда тўп сурган. Ҳозирда Акмалнинг «кончилар» билан шартномаси ниҳоясига етган ва у эркин агент мақомида.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)