Пандемия сабабли ишсизлик нафақат ўрта қатламга, балки дунёнинг энг яхши футбол мураббийларига ҳам маълум миқдорда зарар етказди. Қуйида 2020 йилда хизматларига эҳтиёж сезилмаган таниқли мутахассислар ҳақида фикр юритилади.
Марку Сильва, 2019 йилнинг 5 декабридан бери ишсиз
Сўнгги клуби: «Эвертон»
2018 йилнинг май ойида Сильва «Эвертон» бошқарувини қабул қилиб олди. 2018/2019 йилги мавсумда жамоа португалияликнинг қўл остида Англия чемпионатида саккизинчи ўринни эгаллаб, Еврокубоклар йўлланмасини қўлга кирита олмади. Янги мавсум старти ҳам кўнгилдагидек бўлмади, натижада жамоа 14 очко билан турнир жадвалида 18-ўринга тушиб кетди. Шундан сўнг Сильвага чиқиш эшиклари кўрсатилди.
Бундан ташқари Маркунинг муваффақиятсизликлари «Эвертон»нинг келажакдаги ишларига ҳам ўз таъсирини ўтказди: жамоанинг янги бош мураббийи Карло Анчелотти рекорд даражадаги йўқотишлар туфайли ўзидан олдинги мураббийга берилгани каби 2020 йилнинг қишида катта трансферларни амалга ошира олмади.
Марк ван Боммел, 2019 йилнинг 16 декабридан бери ишсиз
Сўнгги клуби: ПСВ
«Натижалар жуда ёмон ва ПСВ бунга лойиқ эмас. Мусобақалар муҳим, аммо машғулотлар жараёни ҳам ҳал қилувчи аҳамиятга эга. Биз буни диққат билан кузатмоқдамиз. ПСВ – ҳамма бир-бирига ёрдам беришга интиладиган клуб. Сўнгги ойларда ҳам биз барчага ёрдам беришга ҳаракат қилдик. Аммо клуб манфаатлари ҳар доим биринчи ўринда туради. Вазиятни баҳолаш охир-оқибат ушбу оғриқли қарорга олиб келди. Вазиятни ўзгартириш учун қўлимиздан келган барча ишни қилдик. Афсуски, биз муваффақият қозона олмадик», – дейди ПСВ бош директори Тоон Гербрандс ван Боммелнинг ишига баҳо берар экан.
Нидерландиялик мутахассис клубни чемпионликка етаклай олмади ва 2019 йилнинг декабрида 17-турдан сўнг ишдан бўшатилди. Ўшанда ПСВ 31 очко билан мамлакат чемпионати турнир жадвалида 4-ўринни эгаллаб турган эди.
Май ойида эса ван Боммел ўз хизматларини «Милан»га таклиф қилди, аммо клуб бош мураббий лавозимида Стефано Пиолини сақлаб қолди.
Массимилиано Аллегри, 2019 йилнинг 30 июнидан бери ишсиз
Сўнгги клуби: «Ювентус»
Аллегри бир йил давомида футболдан дам олди ва ўтган 2020 йилнинг ёзида ишга қайтишга тайёрлигини эълон қилди.
«Мен бўш вақтимни дам олишга ва оилам, яқинларимга сарфладим. Она шаҳрим Ливорнода эски дўстларим вақтимизни чоғ ўтказдик. Қайси мамлакатда ишлашим мен учун аҳамиятсиз. Биргаликда ҳаракат қиладиган ва амбицияларга эга клубни излаяпман», – дейди Аллегри.
Италиялик мутахассиснинг келиши мумкин бўлган жамоалар қаторида «Манчестер Юнайтед», ПСЖ, «Интер», Нидерландия терма жамоаси ва «Челси» кўрсатилганди.
Мураббийнинг ўзи эса декабрь ойида ўзини Англияда синаб кўрмоқчи эканлигини айтди. «Албатта, мен ўзимни Англия Премьер Лигасида синаб кўрмоқчиман. Италия жамоаларида — тўрт йил «Милан»да, беш йил «Ювентус»да ишлаганман. Энди яна Италияда ёки Англияда ишлашни кутмоқдаман. Ҳозирда инглиз футболи ўсмоқда, чунки у ерда чет эллик мураббийлар жуда кўп, 10 йил олдингига қараганда тактика кўпроқ. Англия эндиликда тактика жиҳатидан анча мураккаб ва мукаммалроқ, аммо у шу билан бирга ўз анъаналарини ҳам ҳурмат қилади», – деганди Аллегри Goal’га берган интервьюсида.
Аммо сўнгги маълумотларга кўра, Массимилианонинг «Интер»да Контенинг ўрнини эгаллаши эҳтимоли юқори.
Лучано Спаллетти, 2019 йилнинг 30 майидан бери ишсиз
Сўнгги клуби: «Интер»
Спалетти «Интер»да ҳеч қандай муваффақиятга эриша олмади. Лучано ҳатто клуб билан шартномани ўз ихтиёри билан бекор қилишдан бош тортди, унга кўра мутахассис 2021 йилнинг ёзигача бир мавсум учун 4,5 миллион евро маош оларди. 2020 йилнинг май ойида мутахассис ишга қайтиш истагини билдирди.
«Масаланинг молиявий томони мени қизиқтирмайди. Бу иш билан менга ёққани учун шуғулланаман. Мураббийлик курсисига қайтмоқчиман», – дейди Спаллетти.
Бироқ Лучано 2020 йилда ҳеч бир клубда кўринмади. Ҳозирча италияликнинг фақат маҳаллий жамоаларни бошқариши мумкинлиги ҳақида миш-мишлар мавжуд.
Марселино Торал, 2019 йилнинг 11 сентябридан бери ишсиз
Сўнгги клуби: «Валенсия»
Чемпионатда тўртинчи ўрин, Чемпионлар Лигаси йўлланмаси, Испания Кубоги – буларнинг ҳеч бири Марселинони «Валенсия»да олиб қола олмади. Мутахассиснинг истеъфоси 2019 йилда Испанияда катта резонансларга сабаб бўлганди. Торал ҳам «Интер»ни бошқариш учун даъвогарлардан бири бўлиб турибди. Бундан ташқари, унинг номи ноябрь ойида «Атлетик»нинг шорт-листида қайд этилганди. Мураббийнинг ўзи бутун фаолияти давомида фақат Испания клубларида фаолият юритган. Шуни ҳисобга олиб уни чет элда кўриш анча қизиқ бўлар эди.
Леонардо Жардим, 2019 йилнинг 27 декабридан бери ишсиз
Сўнгги клуби: «Монако»
Битта дарёга икки марта тушиб бўлмайди, лекин «Монако»ни икки марта бошқариш мумкин. Жардим клубга иккинчи бор келганидан сўнг жамоанинг натижалари яхшиланди, аммо раҳбарият истаган даражада эмас. Шартномани бекор қилиш учун Леонардо ўзининг уч нафар ёрдамчиси билан биргаликда 8 миллион евро миқдорида товон пули олди.
«Клуб бош директори Олег Петров жамоадан кетишимнинг асосий ташаббускори. Мен ҳеч қачон унинг мураббийи бўлганимни ҳис қилмаганман. Рождество таътилидан кейин Петров мени ўз хонасига чақирди ва клуб президентидан менинг истеъфомни сўраганини айтди», – дейди Жардим клубдан кетишининг сабаблари ҳақида.
Май ойида «Монако»нинг собиқ мураббийи «Марсель»ни бошқариши мумкин эди, бироқ музокаралар муваффақиятли ўтмади. Сўнгги хабарларга кўра, Жардим 2021 йилда Москванинг «Спартак» клубини бошқариши кутилмоқда.
Сўнгги клуби: «Саутҳэмптон»
Хьюз уч йилдан бери ишсиз юрибди. Инглиз мутахассиси «Саутҳэмптон»дан бўшатилганидан сўнг Премьер Лига тарихида бир календарь йилида икки марта ишдан бўшатилган илк мураббийга айланди. Марк дастлаб «Сток Сити»ни бошқарган ва у ерда жамоанинг ёмон ўйини туфайли ишдан бўшатилганди.
Шундан сўнг мутахассис «Саутҳэмптон»ни бошқаришни ўз зиммасига олди, у жамоани Чемпионшипга тушиб кетишига йўл қўймаслиги керак эди. Аммо 14-турдан сўнг «Саутҳэмптон» яна хавфли зонага тушиб кетди. Хьюз шартнома муддатидан олдин бекор қилганлиги учун товон пули сифатида 6 миллион фунт стерлингга (тахминан 6,7 миллион евро) эга чиқди.
Винченцо Монтелла, 2019 йилнинг 21 декабридан бери ишсиз
Сўнгги клуби: «Фиорентина»
Монтелла «Рома» қарши кечган ўйиндан сўнг (1:4) «Фиорентина»ни тарк этди.
«Бу жамоа мухлислари («Фиорентина») кўпроқ нарсага лойиқдир. Бунга ҳеч шубҳа йўқ. Ушбу клуб ишқибозлари қалбимда мангу қолади.
Мен, менинг штабим ва футболчилар томонидан баъзи хатоларга йўл қўйилди. Аммо, эҳтимол, хатоларга фақат биз йўл қўймадик. Қайси футболчини ўйнатишим кераклиги ҳақида кўрсатмалар мавжуд эди. Лекин ҳеч ким мендан нима истаётганимни сўрамади ҳам. Мавсум учун ҳеч қандай мақсад йўқ эди. Таркибни янгилаб, рақобат даражасини кўтариш учун январь ойини кутган эдик, биргаликда вазиятни таҳлил қилгандик. Агар истеъфодан ранжимадим десам, ёлғон гапирган бўламан. Ишонаманки, мавсумнинг иккинчи қисмида яхшироқ ўйнаган бўлардик», – дейди Монтелла.
Винченцонинг келажаги ҳақида ҳеч қандай миш-мишлар йўқ. Афтидан, мураббий ҳали футболни соғинмаган кўринади.
Изоҳ (0)