Марказий Осиё ва Қозоғистонни боғловчи ягона энергетик тизимнинг электр узатиш тармоқларида режадан ташқари содир бўлган узилишлар сабабли аварияга қарши автоматика ишлаган. Бу ҳақда Энергетика вазирлиги хабар қилмоқда.
Таъкидланишича, энергетик қурилмаларга шикаст етмаслик учун ускунанинг технологик ҳимояси автоматик равишда ишлаган ва айрим электр станциялардаги энергоблоклар ўчирилди. Хусусан:
- Тўрақўрғон ИЭСда қуввати 750 мегаваттдан 500 мегаваттгача;
- Тахиатош ИЭСда 280 мегаваттдан 150 мегаваттгача;
- Навоий ИЭСда 450 мегаваттдан 230 мегаваттгача;
- Тошкент ИЭСда 370 мегаваттдан 180 мегаваттгача қувват камайган.
Айни пайтда Талимаржон ИЭСда қурилмаларни ишга тушириш жараёни амалга оширилмоқда, қолган электр станцияларда иш режими қайта тикланган. Мазкур ўчиш ҳолатининг сабаблари ўрганилмоқда.
Яқин соатларда электр энергияси таъминотида қисқа муддатли узилишлар кузатилиши таъкидланган ва келтирилган ноқулайликлар учун истеъмолчилардан узр сўралган.
Аввалроқ Ўзбекистон бўйлаб электр таъминотида юзага келган носозлик бартараф этилаётгани ҳақида хабар берилганди.
Изоҳ (0)