Ўзбекистонда Apple компаниясининг расмий офислари очилади. Бу ҳақда АОКАда ўтган брифингда Ахборот технологиялари ва коммуникацияларини ривожлантириш вазирлиги ахборот хизмати раҳбари Шерзод Аҳматов маълум қилди.
Брифинг давомида Шерзод Аҳматов Ўзбекистонда 2020 йил 1 ноябрь ҳолатига кўра, 2019 йилнинг шу даврига нисбатан мобил телефоннинг қонуний импорти қарийб 10 бараварга ошганини маълум қилган. Хусусан, 2020 йил январдан 1 ноябргача Ўзбекистон 781,7 минг мобил телефон импорт қилган.
«Дунёдаги топ-10 ликка кирадиган Samsung компаниясининг республикамизда 4 расмий офиси очилди. Яқин кунларда Apple компаниясининг ҳам расмий офислари очилиши режалаштирилмоқда», — дейди Ахборот технологиялари ва коммуникацияларини ривожлантириш вазирлиги ахборот хизмати раҳбари.
Эслатиб ўтамиз, 2020 йилнинг май ойида тарихдаги энг йирик капиталлашган корпорация — Apple Distribution International Limited Ўзбекистонда ихтиёрий равишда ҚҚС тўловчиси сифатида рўйхатдан ўтгани ва I чоракдаги фаолияти натижаларига кўра, давлат бюджетига 59,2 минг АҚШ доллари миқдорида солиқ тўлагани тўғрисида хабар берилганди.
Изоҳ (0)