Шотландиянинг биринчи вазири Никола Стержен мамлакат яқин орада Европа Иттифоқига қайтишини маълум қилди. «РБК»нинг хабар беришича, бу ҳақда у 1 январь куни Twitter’даги саҳифасида эълон қилди.
«Европа, Шотландия тез орада қайтади. Чироқни ўчирма», — деб ёзган ва ушбу твитга ЕИ ва Шотландия байроқлари бир нечта эможиси, юракчалар ҳамда ЕИ ва мамлакат бирлигини ифодаловчи суръатни қўшиб қўйган.
Декабрь ойи охирида ЕИ ва Лондон Brexit’дан кейин савдо муносабатлари тўғрисида келишувга эришди ва у 2021 йил 1 январда кучга кирди. Буюк Британия ЕИдан расман 1 йил аввал чиққан, аммо муросага келгунча эски қоидалар амал қилишда давом этди.
Шотландия расмийлари мамлакатнинг Европа Иттифоқидан чиқишига қарши эканликлари ҳақида бир неча бор билдирган ва келажакда Буюк Британия ундан чиқишини айтган. 2014 йилда ўтказилган референдум шотландларнинг 55 фоизи Буюк Британиядан ажралишига қарши эканлигини кўрсатган.
2019 йил апрель ойида Стержен аксарият аҳолининг истагига кўра 2021 йил майига қадар яна бир референдум ўтказишга ваъда берди. 2019 йил октябрида Эдинбургда Буюк Британиядан мустақилликни қўллаб-қувватловчи 200 минг кишилик марш бўлиб ўтди.
2020 йилнинг январида Буюк Британия бош вазири Борис Жонсон Шотландия расмийларининг янги референдум ўтказишини рад этди. У Стержен ва унинг тарафдорлари 2014 йилги референдум мустақиллик ҳақидаги «авлодлар давомидаги ягона» референдум бўлишига ваъда берганини эслатган.
Изоҳ (0)