2020 йилда муносабатларига нуқта қўйган юлдузли жуфтликлар

Бир-бирига мос, ҳеч қачон айрилмайдигандек туюлган жуфтликлар ўртасидаги муносабатлар ҳам дарз кетиши, самимийдек кўринган севги узоққа бормаслиги мумкин. Шоу-бизнес вакилларининг 2020 йилда хайрлашган юлдузлари ким экани ҳақида маълумот бериб ўтамиз.

Лили Рейнхарт ва Коул Спроус

Баҳор ойида «Ривердейл» сериали юлдузларининг айрилиши ҳақида миш-мишлар тарқала бошлаган. Спроуснинг модель Кайя Гербер билан кўз уруштириб ҳамда бошқа қизлар билан суратга тушиб юрган бир вақтда актриса асосий вақтини китоб ўқиш ва ўз устида ишлашга сарфлаган. Август ойининг сўнгида актёр Лили билан тушган суратини ижтимоий тармоқдаги саҳифасига жойлаб, аслида улар январь ойида вақтинчалик хайрлашгани, аммо март ойида ҳаммаси буткул тугаганини билдирган. Шунингдек, у севги ҳиссини туйганидан бахтли эканини билдириб, Лилига бахт тилаган.

Ченнинг Татум ва Жесси Жей

Америкалик актёр ва британиялик хонанда муносабатларини аввал ҳам барқарор деб аташ мумкин бўлмаган. Икки йил давомида бир уришиб, бир ярашган жуфтлик 2020 йилнинг кузида жиддий хайрлашган. Актрисанинг октябрь ойида Instagram’га сурат жойлаб «Пандемия вақтидаги ёлғизлик», деб қолдирган изоҳи эса буни тасдиқлаган. Аммо Татум шахсий ҳаёти ҳақидаги маълумотларни эълон қилишни истамаган.

Лили Роуз Депп ва Тимоти Шаламе

Жонни Деппнинг қизи ва «Мени ўз исмим билан ата» фильми юлдузи ўртасидаги муносабатларнинг дарз кетишига уларнинг ҳар иккисини ишдан ортмагани сабаб бўлган. Актёрнинг Vogue журналига берган интервьюсидан кейин уларнинг ҳақиқатан ҳам ажрашгани маълум бўлган. Лили эса бу борада изоҳ беришни истамаган.

Майли Сайрус ва Коди Симпсон

Юлдузли жуфтлик ўртасидаги муносабатлар бир йилга ҳам етиб бормади. Маълумотларга қараганда айрилишнинг ташаббусчиси Майли бўлган. Август ойида у айрилганларини эълон қилиб, уларнинг ҳар иккиси ўз устида ишлаши, нима қилиш ва ҳаётида ким бўлишини қарор қилишга ҳаққи борлигини айтиб, агар келаси ҳафта бирга пицца ейдиган бўлишса, бундан фожиа ясашнинг кераги йўқлигини таъкидлаган.

Мэделин Петш ва Тревис Миллс

Уч йиллик муносабатлардан кейин ҳаммасига нуқта қўйилиши уларнинг мухлислари учун ёқимсиз хабар бўлган. Мэделин бу маълумотни инкор қилган, аммо Тревис улар бошқа бирга эмасликлари ҳақида очиқ хат ёзиб қолдирган. Унда айрилиқ оғир эканлиги, миннатдорлик, севги ва азобни бир сатрга сиғдириш имконсизлигини ёзиб, бирга тушган бирорта ҳам суратларини ўчирмаслигини ва ҳеч нимадан афсусланмаслигини қўшимча қилган.