Тошкент вилоятида бир ҳафта ичида наушник тақиб, темир йўл бўйлаб ҳаракатланган икки аёлни поезд уриб кетди. Улардан бири воқеа жойида вафот этган

Тошкент вилояти ҳудудидаги темир йўлларда икки нафар фуқарони юк поезди уриб кетди. Ҳалокат фуқароларнинг эҳтиётсизлиги оқибатида — наушникни тақиб ҳаракатлангани туфайли содир бўлганлиги аниқланган, деб хабар беради ИИВ матбуот хизмати. Улардан бири — 32 ёшли аёл воқеа жойида вафот этган.

Маълумотларга кўра, 22 декабрь куни соат 13:00 атрофида Тошкент минтақасида юк поезди 1988 йилда туғилган фуқарони уриб юборган. У қулоғига наушник тақиб олиб, темир йўл изида юриб кетаётган бўлган. Фуқаро олган тан жароҳати оқибатида воқеа жойида вафот этган.

Шунингдек, 28 декабрь куни соат 16:25 да Тошкент—Тавар—Сариоғоч йўналишидаги юк поезди, тахминан, 18−20 ёшлар атрофидаги аёл кишини уриб юборган. Ўрганиш ишлари давомида 2002 йилда туғилган қиз наушник тақиб, темир йўл изларида ҳаракатланганлиги маълум бўлган. Ушбу фуқаро жонлантириш бўлимига ётқизилган. Унда аралаш жароҳат, бош мия лат ейиши, бош мия чайқалиши каби жароҳатлар аниқланган.

Аввалроқ Самарқандда юк поезди наушник таққан йигитни уриб кетмаслик учун фавқулодда тўхташни амалга оширгани маълум қилинганди.