Ўзбекистон Энергетика вазирлиги Сурхондарёнинг Шеробод туманида иккинчи қуёш фотоэлектр станциясини қуриш лойиҳаси (Шеробод II) бошланганини маълум қилди.
Янги лойиҳа Энергетика вазирлиги томонидан Ўзбекистон ҳукумати ва Осиё тараққиёт банки ўртасида 1 ГВт қуёш энергияси учун рақобатбардош савдолар ўтказиш учун техник ёрдам кўрсатиш тўғрисида умумий меморандум доирасида амалга оширилади.
Шеробод II лойиҳаси Сурхондарё вилоятининг Шеробод туманида 300 МВт қувватга эга фотоэлектр станциясини қуришни кўзда тутади. Мазкур станция 2024 йилга қадар ишга туширилади. У 2020 йил февралда эълон қилинган биринчи Шеробод I лойиҳаси объектларига яқин жойда қурилади.
Таъкидланишича, Шеробод I лойиҳасини амалга ошириш учун айни пайтда ушбу лойиҳа учун тендер ўтказилмоқда. Таклифлар сўрови 2020 йил 14 декабрда бошланган ва 2021 йил 15 мартгача давом этади. Биринчи босқич доирасида камида 200 МВт қувватга эга фотоэлектр станциясини ва янги инфратузилмани қуриш режалаштирилган.
Йиллик ишлаб чиқариш 1,1 миллиард кВт/соатдан ортиқ бўлган 500 МВт қувватга эга 2 та ФЭС ҳудуддаги йиллик электр энергияси истеъмолининг, тахминан, 30 фоизини таъминлаш имкониятига эга бўлади.
Шеробод II лойиҳаси доирасида очиқ тендер ўтказилади ва бу 2021 йил бошида расман эълон қилинади.
«Осиё тараққиёт банкининг техник хизматлари лойиҳани амалга оширишда шаффофлик ва очиқлик, лойиҳа бўйича хатарларнинг оқилона тақсимланиши, якуний хизматдан фойдаланиш ҳамда нарх ва сифатнинг умумий мутаносиблиги тамойилларига риоя қилган ҳолда илғор дунё ёндашувларидан фойдаланишга қаратилган», — дейилади хабарда.
Аввалроқ Ўзбекистон 2030 йилга қадар қайта тикланадиган энергия манбалари улушини 25 фоизгача ошириши мумкинлиги тўғрисида хабар берилганди.
Изоҳ (0)