Samarqandda yanvar oyida 3 kishi poyezd urib ketishi oqibatida vafot etdi. Ularning biri 8-sinf o‘quvchisi bo‘lgan

Joriy yilning yanvar oyida Samarqand viloyatida poyezd urib ketishi oqibatida uch kishi halok bo‘lgan. Baxtsiz hodisalar qurbonlarining biri 8-sinf o‘quvchisi bo‘lgan. Bu haqda Samarqand viloyati IIB Transportda xavfsizlikni ta’minlash boshqarmasiga tayanib, Zarnews xabar berdi.

Ma’lum qilinishicha, dastlabki holat 2-yanvar kuni soat 12:31 da Toshkent—Samarqand—Qarshi yo‘nalishida qatnovchi “Nasaf” yo‘lovchi poyezdi bilan yuz bergan. Poyezd Pastdarg‘om tumani “Kichik Nayman” mahallasi hududida harakatlanib ketayotgan vaqtda shu mahallada yashovchi fuqaro, mavsumiy ishchi H.Yu.ni urib ketgan. Oqibatda mazkur fuqaro jarohat olib, voqea joyida vafot etgan.

Shuningdek, 2020-yil 10-yanvar kuni soat 20:29 da Moskva—Toshkent yo‘nalishi bo‘yicha harakatlangan poyezd Zarafshon va Jomboy temir yo‘l bekatlari oralig‘idagi “Cho‘ponota” mahallasi hududida harakatlanib kelayotgan vaqtda Farhod shaharchasida yashagan R.B.ni urib ketgan. Hodisa oqibatida ayol jarohat olib, voqea joyida vafot etgan.

O‘lim bilan tugagan uchinchi hodisa 18-yanvar kuni soat 14:00 da Toshkent—Samarqand—Buxoro yo‘nalishida qatnovchi “Sharq” yo‘lovchi poyezdi ishtirokida yuz bergan. Poyezd Ziyovuddin va Navoiy temir yo‘l bekatlari oralig‘idagi Paxtachi tumani “Go‘ro‘g‘li” mahallasi hududida harakatlanib ketayotgan vaqtda shu mahallada yashagan, 2005-yilda tug‘ilgan F.E.ni urib ketgan. Natijada u olgan jarohati sababli voqea joyida vafot etgan.

Shu bilan birga, 11-yanvar kuni soat 14:10 da Paxtachi tumani Ziyovuddin temir yo‘l bekatidagi Ziyovuddin—Tinchlik yo‘nalishida Navoiy kon-metallurgiya kombinatiga qarashli ruda ortilgan yuk poyezdi Paxtachi tumani “Yangiobod” mahallasi hududida harakatlanib ketayotganida baxtsiz hodisa yuz bergan. “Major” mahallasida yashovchi, 1990-yilda tug‘ilgan vaqtincha ishsiz fuqaro Farrux Haydarov yuk vagoni ustiga chiqib, ruda toshlarni talon-toroj qilmoqchi bo‘lganida, ehtiyotsizligi natijasida vagondan tushib ketgan. Uning o‘ng oyog‘i tizza boldir qismini vagon g‘ildiraklari kesib ketgan va jiddiy jarohat olgan.