Арас Булут бош қаҳрамон ролини ижро қилган «Еттинчи бўлмадаги мўъжиза» (Yedinci Koğuştaki Mucize) фильми эфирга узатиш учун Мексика, Чили, Колумбия, Эквадор, Сальвадор, Гондурас, Исроил ва Доминикан Республикаси томонидан сотиб олинди. Бу ҳақда «КиноТека» хабар беради.
Аввалроқ Туркия Маданият вазирлиги 2021 йил 23 апрелда Лос-Анжелесда бўлиб ўтадиган «Оскар» мукофотининг 93-тақдирлаш маросимига Меҳмет Ада Ўзтекин режиссёрлигидаги ушбу фильм номзод сифатида танлаб олингани ҳақида хабар берилганди. Netflix платформасида тақдим қилинганидан кейин янада эътибор ошган ушбу фильмга қизиқиш тобора ортиб бораётган бўлиб, тез орада у билан боғлиқ бир қанча янги келишувлар эълон қилинади.
Жанубий Кореянинг худди шу номли фильмининг учинчи ремейки бўлган «Еттинчи бўлмадаги мўъжиза»да ҳаётдаги ноҳақлик ва адолатсизликлар Мемо исмли қаҳрамон ва унинг қизи билан боғлиқ воқеа асосида ҳикоя қилинади.
Сюжетга кўра, ақлан ривожланмай қолган, аммо бировга зарари тегмайдиган қаҳрамон нотўғри вақтда, тўғри бўлмаган жойда бўлиб қолгани туфайли даҳшатли жиноятда айбланади ва ўлим жазосига ҳукм қилинади. Қамоқдаги беайб Мемо ва қизининг кечинмалари, ота-бола ўртасидаги «телбаларча» севги ҳамда воқеалар ривожи мухлисларни экран қаршисига михлаб қўяди.
Арас Булут ижроси муваффақиятини таъминлаган фильмда, шунингдек, Илкер Аксум, Месут Акуста ва Дениз Байсал суратга тушган.
Изоҳ (0)