Ўзбекистонда 2020 йилдаги пахта терими даврида меҳнат қонунчилиги бузилганлиги учун 174 нафар мансабдор шахсга нисбатан жами 745,7 миллион сўм миқдорида маъмурий жарима тайинланган. Бу ҳақда 28 декабрь, душанба куни АОКАда ўтказилган брифингда Давлат меҳнат инспекцияси Бош давлат меҳнат ҳуқуқ инспектори Гулруҳ Ниёзметова маълум қилди, деб хабар беради «Kun.uz».
Маълум қилинишича, 2020 йилда Давлат меҳнат инспекцияси (ДМИ) томонидан фермер хўжаликлари ва кластерларда 3048 дан ортиқ мажбурий меҳнатга жалб этиш ҳолатини ўрганиш ишлари олиб борилган. Ўрганишлар давомида 96 минг нафардан ортиқ теримчи ва ишчи ходимлар билан суҳбат ўтказилиб, меҳнат қонунчилиги талабларига риоя этилиши таҳлил қилинган.
Натижада мажбурий меҳнатга йўл қўйилган 47 та ҳолат пахта йиғим-терими билан боғлиқ бўлиб, шундан 6 та ҳолат юзасидан тегишли ҳужжатлар судларга киритилган.
«Пахта йиғим-терими даврида ДМИ томонидан меҳнат қонунчилиги бузилгани учун 174 нафар мансабдор шахсга жами 745 миллион 712 минг сўм миқдорида маъмурий жарима тайинланди.
ДМИнинг сайт ва Telegram тармоқлари орқали пахта йиғим-терими даврида меҳнат ҳуқуқи бузилишларига оид жами 790 та мурожаат келиб тушган бўлиб, шундан Call-марказимиз орқали 461 та, веб-сайт орқали 15 та, ижтимоий тармоқлар орқали 113 та ҳамда 201 та ёзма ариза қайд этилди», — дейди Гулруҳ Ниёзметова.
Бундан ташқари, брифингда мажбурий меҳнатга энг кўп йўл қўйган вилоят, меҳнат қонунчилиги бузилиши билан боғлиқ ҳолатлар бўйича ҳам маълумот берилган.
«Аниқланган мажбурий меҳнат ҳолатларига ҳудудлар кесимида қарайдиган бўлсак, жорий йилги пахта мавсумида мажбурий меҳнатнинг асосий қисми Наманган вилоятида кузатилди. Шунингдек, Жиззах, Тошкент, Сурхондарё, Хоразм, Андижон, Бухоро, Қашқадарё, Навоий ва Фарғона вилоятларида ҳам бу каби ҳолатлар қайд этилди. 2020 йилнинг жорий даврига қадар ДМИнинг иш юритувига жами 23 615 та мурожаат келиб тушган бўлса, шулардан 13 360 таси қаноатлантирилди. Фуқароларнинг бузилган меҳнат ҳуқуқлари тикланди.
Шунингдек, иш ҳақларини ўз вақтида бермаган, ходимлар учун зарур шароитлар яратмаган ҳамда тегишли тартибда меҳнат шартномасини тузмаган 127 нафар мансабдор шахсга нисбатан маъмурий жарималар қўлланилди. Блогерлар томонидан жойларда меҳнат қонунчилиги талабларига амал қилмаслик бўйича ижтимоий тармоқларда ёритилган жами 113 та хабар зудлик билан жойларда ўрганилди. Улардан 25 тасида келтирилган важлар ўз тасдиғини топди», — дейди мутахассис.
Аввалроқ Наманган вилоятида мажбурий меҳнатга йўл қўйгани учун Поп тумани ҳокими жаримага тортилгани, Чортоқ ва Учқўрғон туманлари ҳокимларига ҳайфсан берилгани ҳақида хабар берилган эди. Сенат раиси Танзила Норбоеванинг таъкидлашича, Наманганда мажбурий меҳнат бўйича 2013 йилдан бери «гард» ҳам чиқмаган эди.
Изоҳ (0)