SARS-CoV-2 коронавирусининг Буюк Британияда аниқланган янги штамми олдинги мутациялардан кўра анча юқумли бўлиб, 2021 йилда касаллар ва қурбонлар сонининг ортишига олиб келиши мумкин. Бу ҳақда Лондон гигиена ва тропик тиббиёт мактабининг Юқумли касалликларни математик моделлаштириш маркази олимларига таяниб, «РБК» хабар берди.
Олимлар математик модель ёрдамида коронавируснинг VOC 202012/01 номини олган вариантини бошқа штаммлар билан таққослаб кўриб, у 56 фоизга юқимлироқ эканлигини аниқлаган. «Вируснинг юқиш эҳтимоллиги юқорилиги касаллар сонининг сезиларли даражада ортишича олиб келиши мумкин, шу билан бирга, 2021 йилда касалхонага ётқизиладиган беморлар ва вирус қурбонлари сони 2020 йилдагига қараганда юқори натижага чиқади», — дея огоҳлантиради олимлар.
Шунингдек, тадқиқот муаллифлари ҳозирча янги штамм оғирроқ касалланиш ҳолатини юзага келтиришига аниқ исботлар йўқлигини маълум қилган.
Олимларнинг ҳисоблашича, Буюк Британиянинг минтақавий даражадаги чекловлари вирус тарқалишини тўхтатиб қолишга ёрдам бермайди. Тадқиқот муаллифлари ноябрь ойида Англияда жорий этилган локдаун каби чекловлар касаллар сони ортиши ва унинг тарқалишини камайтиришга қодир эмаслигидан огоҳлантирган.
Буюк Британия Жамоатчилик соғлиқини сақлаш хизматининг маълумотларига кўра, SARS-CoV-2’нинг янги штамми қиролликда ноябрь ойидан буён фаол тарқалмоқда. Мамлакат бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфли эмас.
Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда.
Изоҳ (0)