Ўзбекистонда ноябрь—декабрь ойларида умумтаълим мактабларида фаолият олиб бораётган ўқитувчиларнинг 0,2 фоизида касалланиш ҳолатлари кузатилган. Бу ҳақда Халқ таълими вазирининг биринчи ўринбосари Усмон Шарифхўжаев Халқаро пресс-клубнинг навбатдаги сессиясида маълум қилди.
Шарифхўжаевнинг сўзларига кўра, Халқ таълими тизимида 700 мингдан ортиқ педагог ва бошқа ходимлар фаолият олиб боради. Соғлиқни сақлаш вазирлиги билан биргаликда мактаблар очилишидан олдин барча ўқитувчилардан коронавирус бор-йўқлигини аниқлаш учун тест олинган ва улар гриппга қарши бепул эмланган.
Бундан ташқари, республикадаги барча педагог-ўқитувчиларга касалликнинг енгил ва аломатсиз шакллари ва гумон қилинганда уйда даволаш учун зарур дори воситалари жамланмаси — COVID-box бепул етказиб берилган.
Вазир ўринбосарининг таъкидлашича, мактабларнинг очилиши беморлар сони кўпайишига хизмат қилмаган. Аксинча, мактаблар очилгандан сўнг касалланиш кўрсаткичлари камайиб борган.
«Ноябрь—декабрь ойларида мактабларда фаолият олиб бораётган ўқитувчиларнинг 0,2 фоизида касалланиш ҳолатлари кузатилди. Айтмоқчи бўлганим, ишга чиқишидан олдин ўқитувчилар оммавий равишда тестдан ўтказилиб, касаллик аломатлари аниқланган шахслар қолганлардан ажратиб олингани, педагоглар тўлиқ гриппга қарши эмлангани ва улар COVID-box’лар билан таъминлангани учун мактабларда коронавирус кенг тарқалишининг олдини олди», — дейди Усмон Шарифхўжаевнинг.
«Мактабларни очиш бўйича нафақат ХТВ, балки ССВ, республикадаги барча вазирлик ва идоралар узоқ вақт давомида бош қотирди. Ўша даврга келиб аксарият ота-оналар беш ойдан бери фарзандлари билан уйда карантинда қолиб кетганди. Уларга қулоқ соладиган бўлсак, кимдир мактабларни очишни сўраган эди, кимдир COVID-19 ва бошқа касалликлардан қўрқиб анъанавий таълим тикланишига қарши чиққанди. Ҳозир орқага қараб эсласам, албатта, бу даврда қайсидир қарорни қабул қилиш маълум бир тоифа одамларнинг эътирозига ёки тушунмовчилигига олиб келиши табиий эди», — дейди вазир ўринбосари.
Шарифхўжаевнинг айтишича, бу борада ота-оналарнинг фикрлари ўрганилган, улар ўртасида сўров ўтказилган. Сўров натижаларига кўра, ота-оналарнинг 70 фоиздан ортиғи мактабларнинг анъанавий шаклда иш бошлашини ёқлаб овоз берган.
Ҳозирга келиб республика миқёсидаги 6,2 миллион ўқувчининг 90 фоизи мактабга қатнаб билим олмоқда. Баъзи вилоятлардаги туманларда бу кўрсаткич 95 фоизгача етади, бироқ йирик шаҳарларда, жумладан, Тошкент шаҳрида ота-оналарнинг кўпчилиги фарзандларининг масофавий таълим олишини маъқул кўрмоқда.
Эслатиб ўтамиз, Тошкент шаҳридаги умумтаълим муассасаларида таълим жараёнларини босқичма-босқич бошлаш мақсадида, 14 сентябрдан бошлаб 139 та мактаб ўз фаолиятини бошлагани тўғрисида хабар берилганди. 21 сентябрда улар сони 160 тага етганди. Шу билан бирга, 15 сентябрдан бошлаб Шайхонтоҳур туманидаги 40, 262-сонли мактабларда, орадан икки кун ўтиб, тумандаги 59-сонли мактабда анъанавий ўқув жараёни коронавирус инфекцияси бўйича эпидемик вазият барқарор бўлгунга қадар вақтинчалик тўхтатилган.
Изоҳ (0)