Олий ва ўрта махсус таълим вазирининг биринчи ўринбосари Ўктам Саломов Халқаро пресс-клубнинг навбатдаги сессиясида Ўзбекистондаги олий таълим муассасаларининг талабалари ўртасида коронавирус инфекциясини юқтириб олиш ҳолатлари деярли кузатилмаётганини маълум қилди.
Вазир ўринбосарининг сўзларига кўра, коронавирус билан курашиш ва пандемия даврида таълимни тиклаш жараёни Олий таълим вазирлиги учун бирмунча осонроқ кечган.
«Чунки бизгача Халқ таълими вазирлиги бу босқичдан ўтганди. Олий таълим вазирлиги ушбу жараёнда қатнашиб, бу борада маълум бир тажрибага эга бўлди. Лекин олий таълим тизимининг ўзига хос хусусиятлари бор эди. Масалан, талабаларнинг ёши катта бўлиб, улар коронавирус юқиши эҳтимоли юқори бўлган тоифага киришарди. Бундан ташқари, аксарият олий таълим муассасалари талабалари турли ҳудудлардан келиб ўқишларига тўғри келарди, мазкур вазиятда улар талабалар турар жойларида ёки ижарада яшаши билан боғлиқ муаммолар бўлгани учун анъанавий таълимни ХТВга нисбатан кечроқ бошладик», — дейди Ўктам Саломов.
Саломовга кўра, Олий ва ўрта махсус таълим вазирлиги ҳам талабалар ва уларнинг ота-оналари ўртасида сўров ўтказган. Таъкидланишича, респондентларнинг 82 фоизи анъанавий таълимни ёқлаб овоз берган, Шундан сўнг, Республика махсус комиссиясининг 12 ноябрдаги қарорига асосан 16 ноябрдан барча олий таълим муассасаларида анъанавий шаклда таълимга ўтилиши тавсия этилган.
«Анъанавий таълим қайта тиклангач, талабалар ва ОТМ ходимлари, профессор-ўқитувчилари ўртасида коронавирус инфекцияси тарқалишининг олдини олиш мақсадида вазирлигимиз ҳамда ССВ ўртасида қўшма қарор қабул қилинди. Мазкур қарор билан коронавирус кенг ёйилишига қарши профилактик чора-тадбирлар тасдиқланиб, шунинг доирасида ОТМ ходимларига COVID-бохълар тарқатилди. Профессор-ўқитувчилари ва бошқа ходимларининг коронавирус билан касалланиш кўрсаткичлари Ўзбекистондаги ўртача статистикадан ошмайди. Худди мактаб ўқитувчиларида бўлгани каби ОТМ профессор-ўқитувчиларининг 0,2 фоизи COVID-19 билан касалланган», — дейди вазир ўринбосари.
Аввалроқ Халқ таълими вазирининг биринчи ўринбосари Усмон Шарифхўжаев Ўзбекистонда ноябрь—декабрь ойларида умумтаълим мактабларида фаолият олиб бораётган ўқитувчиларнинг 0,2 фоизида касалланиш ҳолатлари кузатилганини маълум қилганди.
Мавзуга доир: Олий таълим вазирлиги: Агар талабаларда имконият бўлмаса, ўқишни масофадан туриб давом эттириши мумкин
Изоҳ (0)