O‘zbekistonda noyabr—dekabr oylarida umumta’lim maktablarida faoliyat olib borayotgan o‘qituvchilarning 0,2 foizida kasallanish holatlari kuzatilgan. Bu haqda Xalq ta’limi vazirining birinchi o‘rinbosari Usmon Sharifxo‘jayev Xalqaro press-klubning navbatdagi sessiyasida ma’lum qildi.
Sharifxo‘jayevning so‘zlariga ko‘ra, Xalq ta’limi tizimida 700 mingdan ortiq pedagog va boshqa xodimlar faoliyat olib boradi. Sog‘liqni saqlash vazirligi bilan birgalikda maktablar ochilishidan oldin barcha o‘qituvchilardan koronavirus bor-yo‘qligini aniqlash uchun test olingan va ular grippga qarshi bepul emlangan.
Bundan tashqari, respublikadagi barcha pedagog-o‘qituvchilarga kasallikning yengil va alomatsiz shakllari va gumon qilinganda uyda davolash uchun zarur dori vositalari jamlanmasi — COVID-box bepul yetkazib berilgan.
Vazir o‘rinbosarining ta’kidlashicha, maktablarning ochilishi bemorlar soni ko‘payishiga xizmat qilmagan. Aksincha, maktablar ochilgandan so‘ng kasallanish ko‘rsatkichlari kamayib borgan.
“Noyabr—dekabr oylarida maktablarda faoliyat olib borayotgan o‘qituvchilarning 0,2 foizida kasallanish holatlari kuzatildi. Aytmoqchi bo‘lganim, ishga chiqishidan oldin o‘qituvchilar ommaviy ravishda testdan o‘tkazilib, kasallik alomatlari aniqlangan shaxslar qolganlardan ajratib olingani, pedagoglar to‘liq grippga qarshi emlangani va ular COVID-box’lar bilan ta’minlangani uchun maktablarda koronavirus keng tarqalishining oldini oldi”, — deydi Usmon Sharifxo‘jayevning.
“Maktablarni ochish bo‘yicha nafaqat XTV, balki SSV, respublikadagi barcha vazirlik va idoralar uzoq vaqt davomida bosh qotirdi. O‘sha davrga kelib aksariyat ota-onalar besh oydan beri farzandlari bilan uyda karantinda qolib ketgandi. Ularga quloq soladigan bo‘lsak, kimdir maktablarni ochishni so‘ragan edi, kimdir COVID-19 va boshqa kasalliklardan qo‘rqib an’anaviy ta’lim tiklanishiga qarshi chiqqandi. Hozir orqaga qarab eslasam, albatta, bu davrda qaysidir qarorni qabul qilish ma’lum bir toifa odamlarning e’tiroziga yoki tushunmovchiligiga olib kelishi tabiiy edi”, — deydi vazir o‘rinbosari.
Sharifxo‘jayevning aytishicha, bu borada ota-onalarning fikrlari o‘rganilgan, ular o‘rtasida so‘rov o‘tkazilgan. So‘rov natijalariga ko‘ra, ota-onalarning 70 foizdan ortig‘i maktablarning an’anaviy shaklda ish boshlashini yoqlab ovoz bergan.
Hozirga kelib respublika miqyosidagi 6,2 million o‘quvchining 90 foizi maktabga qatnab bilim olmoqda. Ba’zi viloyatlardagi tumanlarda bu ko‘rsatkich 95 foizgacha yetadi, biroq yirik shaharlarda, jumladan, Toshkent shahrida ota-onalarning ko‘pchiligi farzandlarining masofaviy ta’lim olishini ma’qul ko‘rmoqda.
Eslatib o‘tamiz, Toshkent shahridagi umumta’lim muassasalarida ta’lim jarayonlarini bosqichma-bosqich boshlash maqsadida, 14-sentabrdan boshlab 139 ta maktab o‘z faoliyatini boshlagani to‘g‘risida xabar berilgandi. 21-sentabrda ular soni 160 taga yetgandi. Shu bilan birga, 15-sentabrdan boshlab Shayxontohur tumanidagi 40, 262-sonli maktablarda, oradan ikki kun o‘tib, tumandagi 59-sonli maktabda an’anaviy o‘quv jarayoni koronavirus infeksiyasi bo‘yicha epidemik vaziyat barqaror bo‘lgunga qadar vaqtinchalik to‘xtatilgan.
Izoh (0)