Андижон вилояти «Ягона буюртмачи хизмати» ИК раҳбари Муҳиддин Қодиров ўзига тегишли бўлган Milano Biznes Servis МЧЖга қарийб 20 миллиард сўмлик қурилишга оид давлат буюртмаларини олган. Бу ҳақда Давлат харидлари порталига таяниб «Davletov.uz» Telegram канали хабар берди.
Муҳиддин Қодиров 2009 йилнинг 18 апрелида рўйхатдан ўтган ва уй-жойлар қурилиши билан шуғулланадиган Milano Biznes Servis компаниясининг ягона таъсисчиси ҳисобланади.
Тўғридан-тўғри давлат харидлари маълумотларига кўра, Milano Biznes Servis учта лойиҳа бўйича пудратчи этиб танланган:
- Избоскан туманидаги 42-сонли мактабни 6,89 миллиард сўмга реконструкция қилиш;
- Жалақудуқ туманидаги «Ойим» кўп тармоқли поликлиникасини 6 миллиард сўмга реконструкция қилиш;
- Қўрғонтепа туманидаги 5-сонли мактабни 6,7 миллиард сўмга реконструкция қилиш.
Бундан ташқари «Андижон иҳлос қурилиш» МЧЖ Инқирозга қарши курашиш жамғармаси маблағларидан амалга ошириладиган қурилиш объектлари манзилли рўйхатидаги тахминан 10,8 миллиард сўмлик давлат буюртмаларини бажаришга масъул қилиб белгиланган. Айни пайтда Республика бюджетидан соғлиқни сақлаш соҳасида амалга ошириладиган манзилли қурилиш рўйхатидаги 3,2 миллиард сўмлик объектлар мазкур компанияга берилган. Шунингдек, мазкур компания Пахтаобод туманида 26,5 млрд сўмлик иккита 32 квартирали кўп қаватли уйни қуриш ва тегишли иншоотларни таъмирлаш бўйича тендерда ғолиб бўлган. Тегишли шартнома 2020 йил 9 ноябрда имзоланган.
«Gazeta.uz»нинг аниқлашича, Andijon Ihlos Qurilish, шунингдек, Шаҳрихон туманидаги сув таъминотини реконструкция қилиш бўйича 4,7 миллиард сўмлик ва Улуғнор туманидаги Санитария-эпидемиология хизмати бўлинмасининг янги биносини қуриш бўйича 2,7 миллард сўмли тендерларда ғолиб бўлган.
2020 йилнинг 30 март куни ҳукумат қарори билан Андижон вилояти қурилиш бош бошқармаси бошлиғи лавозимига тайинланган Рустамбек Тожибоевич Хожибоев ҳали ҳам Ixtisoslashgan Shahrixon Qurilish МЧЖ улушларига тўлиқ эгалик қилади.
Мазкур компания амалдорнинг янги лавозимдаги даврида ҳам миллиардлик шартномаларни олишда давом этган. Масалан, соғлиқни сақлаш соҳасида республика бюджетидан бажариладиган 18,73 миллиард сўмлик қурилиш объектлари айнан Рустамбек Хожибоевнинг компаниясига насиб қилган. Масалан, 2020 йилнинг 2 октябрь куни имзоланган пудрат шартномасига биноан, Ixtisoslashgan Shahrixon Qurilish МЧЖ Шаҳрихон тумани 2-туғуруқ мажмуасини қарийб 5,6 миллиард сўмга реконструкция қилиши зарур. Бу компания тумандаги 1-туғуруқ мажмуасини ҳам якуний қиймати қарийб 12,8 миллиард сўмга реконструкция қилиб келади.
«Давлат харидлари тўғрисида»ги қонуннинг 5-моддасига кўра, манфаатлар тўқнашуви мавжуд бўлган тақдирда, харид қилиш тартиб-таомилларини ташкил этиш ва ўтказиш учун жавобгар бўлган шахс бажариладиган вазифалардан четлаштирилиши лозим.
«Коррупцияга қарши курашиш тўғрисида»ги қонуннинг 21-моддасига асосан, давлат органларининг ходимлари мансаб ёки хизмат мажбуриятларини бажариш чоғида манфаатлар тўқнашувига олиб келадиган ёки олиб келиши мумкин бўлган шахсий манфаатдорликка йўл қўймаслиги керак.
Коррупцияга қарши курашиш агентлигининг маълум қилишича, агентлик Андижон вилоятидаги манфаатлар тўқнашуви юзасидан ўрганиш ишларини бошлаган.
Изоҳ (0)