Бугун,

  • USD 11014.01
  • RUB 191.8
  • EUR 10674.78

Ижтимоий тармоқларда ва электрон оммавий ахборот воситаларида Туркиянинг Живрил шаҳрида ўзбекистонлик қиз мажбуран ушлаб турилгани тўғрисида хабарлар тарқалди. Ўзбекистоннинг Анқара шаҳридаги элчихонаси Туркиянинг ваколатли идораларига мазкур ҳолат бўйича расмий мурожаат қилди. Бу ҳақда Ўзбекистон Ташқи ишлар вазирлиги хабар берди.

Фото: «Дарё»

Фото: «Дарё»

Ҳуқуқни муҳофаза қилувчи органлардан олинган маълумотларга кўра, Ўзбекистон Республикаси фуқароси Ш.Х. Туркия фуқароси Ж.Ч.га турмушга чиқиш учун 2020 йил 14 ноябрда Туркияга келган. Қисқа муддат бирга яшагандан сўнг, ўзбекистонлик қиз оилавий ҳаёт ва ижтимоий шароитдан норози эканлиги, шунингдек, онасининг соғлиғи ёмонлашгани сабабли Ўзбекистонга қайтишга қарор қилган.

Элчихонанинг хабар беришича, ҳозирги кунда мазкур фуқаро Денизли вилоятидаги ихтисослашган шифохоналардан бирида коронавирус инфекциясидан даволаниш учун муолажа олмоқда. Шу сабабли у билан тўғридан-тўғри боғланиш имконияти мавжуд эмас.

«Денизли вилояти жандармериясининг маълумотларига кўра, беморнинг аҳволи барқарор деб баҳоланмоқда, ҳамюртимиз танасида жароҳатлар аниқланмаган. Ушбу масала Денизли вилояти прокуратурасининг махсус назоратига олинган, суриштирув ишлари олиб борилмоқда.

Вазият Ўзбекистоннинг Туркиядаги элчихонасининг доимий назоратида, ваколатли органлар ва ҳамюртимиз даволанаётган тиббиёт муассасаси билан алоқа ўрнатилган», — дейилади Ўзбекистон ТИВ хабарида.

Эслатиб ўтамиз, 2019 йилнинг 23 сентябрь куни ўзбекистонлик 23 яшар қиз Нодира Қодирова Туркиянинг Анқара шаҳрида депутат Ширин Уналнинг уйида вафот этган эди. Президент Ражаб Тоййиб Эрдўғоннинг «Адолат ва тараққиёт» партиясидан Миллат мажлиси депутатлигига сайланган Ширин Уналнинг уйида хизматчи бўлиб ишлаган Қодирова вафоти бўйича тергов ҳаракатлари 5 ойдан ортиқ вақт давом этган.

Воқеа юз берган илк дақиқаларданоқ Ширин Унал ва унинг оиласи Нодира Қодирова ўз жонига қасд қилганини таъкидлаб келмоқда. Бу орада у марҳумни психологик жиҳатдан носоғломга, шунингдек, тарбияси бузуққа чиқаришга уринди. Қодированинг оила аъзолари, жумладан, воқеа юз берган вақтда Анқарада бўлган акаси Муҳаммадали Қодиров эса синглиси ўз жонига қасд қилмагани, балки ўлдирилганини айтмоқда. Тергов хулосаларида қайд этилишича, Қодированинг ўлимида ишлатилган Beretta русумидаги қуролда бармоқ излари аниқланмаган.

Изоҳ
Асосий янгиликлар