Жанубий Корея Бирлашган Миллатлар Ташкилотининг Оролбўйи минтақасида Инсон хавфсизлиги бўйича кўпшериклик жамғармасига 1 миллион АҚШ доллари миқдорида маблағ ажратди. 17 декабрь куни Жанубий Корея ҳукумати ва Фонднинг Нью-Йоркдаги ваколатхонаси ўртасида бу борада шартнома имзоланди, дея хабар қилмоқда «Gazeta.uz».
Жамғарма маълумотларига кўра, маблағлар Оролбўйи аҳолисининг ижтимоий-иқтисодий шароитларини яхшилаш, соғлиғи ва фаровонлигини оширишда ёрдам беради.
Жанубий Корея ҳукумати ўз ҳиссасидан ташқари, минтақадаги турли ташаббусларни қўллаб-қувватлайди. Хусусан, Корея халқаро ҳамкорлик агентлигининг (KOICA) Оролбўйи минтақасини кўп томонлама ривожлантириш лойиҳаси доирасида Global Green Growth Institute (GGGI) орқали 5,56 миллион доллар миқдорида грант ажратиш режалаштирилган.
БМТ ҳомийлигидаги траст фонди 2018 йил охирида ташкил этилган. Жамғарманинг биринчи ташқи ҳамкори Норвегия бўлиб, у 2019 йилда тахминан 1,1 миллион АҚШ доллари ажратди. 2020 йил март ойида Европа Иттифоқи фонд лойиҳаларини молиялаштириш учун 5 миллион евро ажратди. Донорлар рўйхатига июнь ойида Финляндия қўшилди. Шунингдек, Ўзбекистон ҳукумати жамғармага 3,5 миллион АҚШ доллари ўтказган.
Жамғарманинг асосий вазифалари қаторида Оролбўйи минтақасидаги аҳоли ҳаёти билан боғлиқ долзарб муаммоларни, шу жумладан, соғлиқни сақлаш, иқтисодий ривожланиш, экологик вазият, ижтимоий ҳимоя ва бошқа жиҳатларни ҳал қилишга мувофиқлаштирилган ёндашувни таъминлаш киради.
Жамғарма Оролбўйи минтақасини ривожлантиришга Ўзбекистон ҳукумати, БМТ агентликлари ва донорлар ҳамжамиятининг саъй-ҳаракатларини бирлаштириш, минтақани ривожлантириш учун техник ва молиявий ресурсларни сафарбар қилиш ва минтақани барқарор ривожлантириш учун янги билимларни, инновацион технологиялар ва ёндашувларни жалб қилиш орқали комплекс ёрдам кўрсатиш билан шуғулланади.
Аввалроқ Оролбўйи аҳолисига бизнес кўникмалари ўргатилиши ҳамда Шавкат Мирзиёев Оролбўйи минтақасини экологик инновация ва технологиялар ҳудуди деб эълон қилиш ҳақида БМТ резолюциясини қабул қилишни таклиф этгани ҳақида хабар берилганди.
Изоҳ (0)