Қозоғистонда вафот этган эгасининг қабрини икки ой қўриқлаб ётган ит машҳурликка эришди. Уни дунёга машҳур Хатикога қиёслашмоқда, деб хабар беради Tengrinews.
Ушбу ит ҳақида биринчи бўлиб олмаоталик Александр Вогау сўзлаб берган. Эркак итни 18 декабрь куни пайқаб қолган. У итни видеога олиб, ижтимоий тармоқларга жойлаштирган.
«Мана, йигитлар, бу итларга хос ҳақиқий фидоийлик. Одамлар бундан ўрнак олиши керак. Қор камида 10 кун олдин ёғган, бу жой эса қуруқ. Ит у ерда худди постдагидек — ҳар куни», — дейди видео муаллифи.
Александр Вогуанинг сўзларига кўра, у қариндошларидан бирини дафн этиш учун қабристонга борган.
«Уч кун давомида у ерда бўлган бўлсам, ит постда эди. Олдига бориб, овқат бердим. Бу каби фидоийлик инсонлар учун намуна. Шу сабабли ёнидан жимгина ўтиб кета олмадим, суратга олдим, овқатлантирдим. Ўзимни учта итим бор, бўлмасам уни ҳам олиб кетар эдим. Итнинг эгаси дафн этилган жой энг бурчакда — елвизак бўладиган жойда. Агар у исинишни хоҳлаганида, бошқа жойда ўтирган бўларди», — дейди Александр Вогуа.
Эркакнинг айтишича, қабристон қоровули ит қабр қаршисида 1,5 ойдан буён ўтирганини сўзлаб берган. Аввалига у бунга эътибор бермаган, бироқ кейинчалик итни овқатлантиришни бошлаган.
«Қозоғистонлик Хатико» ҳақида «Оқ Бим» номли ҳайвонлар учун бошпана бериш билан шуғулланадиган ташкилотнинг волонтёрлари хабар топган. Улар итни олиб кетиб, уни бошқа бошпанасиз ҳайвонлар олдига жойлаштирган.
Волонтёрларнинг сўзларига кўра, ит жуда ақлли ва меҳрибон. Ҳозирда ушбу итни боқиб олишни хоҳловчи янги хўжайин қидирилмоқда.
Аввалроқ Перуда вафодор ит бир неча кундан бери касалхона олдида коронавирусга чалинган эгасини кутаётгани тўғрисида хабар берилганди.
Изоҳ (0)