Ўзбекистонда Жаҳон банки, Masdar компанияси (БАА) ва Осиё тараққиёт банки 100 МВт кучга эга бўлган Ўзбекистондаги илк қуёш электростанциясини молиялаштириш бўйича кредит ва суғурта шартномаларини имзолади. Бу ҳақда Жаҳон банкининг матбуот хизматига таяниб, «Gazeta.uz» хабар берди.
Станция Ўзбекистонда хусусий компания томонидан қурилган ва бошқариладиган энергетика соҳасидаги илк катта масштабли объектга айланади.
Халқаро молия корпорацияси (IFC, Жаҳон банкининг таркибига киради) ва ОТБ лойиҳани молиялаштириш учун 60 миллион долларгача маблағ ажратади. Европа тикланиш ва тараққиёт банки эса Masdar компаниясига акциядорлик жамиятини молиялаштириш учун 5,1 миллион долларлик қисқа муддатли кредит ажратади.
Электростанцияни қуриш ва унинг эксплуатацияни амалга ошириш ишлари билан Nur Navoi Solar компанияси шуғулланади. Компания Masdar’га тегишли.
Эслатиб ўтамиз, 2019 йил октябрь ойида Masdar қуёш энергиясини ишлаб чиқариш бўйича Ўзбекистон тарихидаги илк давлат-хусусий шерикчилик тендер танловида ғолиб бўлганди.
Masdar 25 йил давомида кВт/соат учун 2,679 сент тарифида электроэнергия билан таъминлаш мажбуриятини олган. Бу ҳозирда Марказий Осиёда мавжуд бўлган энг арзон нархдаги тарифдир. Nur Navoi Solar 2046 йилгача юқорида кўрсатилган нархда «Миллий электр тармоқлари»га электр энергиясини сотади.
Мавзуга доир: Ўзбекистонда ўн йил ичида умумий қуввати 5 минг мегаватт бўлган қуёш электр станциялари қуриш режалаштирилмоқда
Изоҳ (0)