Хўжайли ва Пахтачида 2 киши совуқ уриши оқибатида ҳалок бўлди

Қорақалпоғистонда ва Самарқанд вилоятида икки киши совуқ уриши оқибатида ҳалок бўлди, бу ҳақда Ички ишлар вазирлиги бирлашган таҳририяти хабар берди.

2020 йилнинг 6 декабрь куни бедарак йўқолгани учун қидирувга берилган Қорақалпоғистон Республикасининг Хўжайли тумани «Саришингул» овул фуқаролар йиғини ҳудудида яшаган, 1991 йилда туғилган Н.Р.нинг ташқи кўринишидан жароҳатсиз жасади «Кулаб» овул фуқаролар йиғини ҳудудидан топилган.

Ўтказилган суд-тиббий экспертизасининг дастлабки хулосасига кўра, у тананинг умумий совқотишидан ҳалок бўлгани аниқланган.

Худди шундай ҳолат Самарқанд вилоятининг Пахтачи туманида ҳам юз берди. 2020 йилнинг 17 декабрдаги маълумотга кўра, «Фаровон Йўлдошобод» маҳалла фуқаролар йиғини ҳудудида жойлашган «Агросаноат» МЧЖга тегишли дала майдонидан 30-35 ёшлардаги номаълум эркак кишининг ташқи кўринишидан жароҳатсиз жасади топилган.

Ўтказилган суд-тиббий экспертизасининг хулосасига кўра, у тананинг умумий совқотишидан вафот этган. Кўрилган чоралар натижасида жасаднинг шахси аниқланган. У Нарпай туманида яшаган, 1990 йилда туғилган Н.V. эканлиги маълум бўлган.

Айни пайтда ҳар икки ҳолат юзасидан суриштирув ҳаракатлари олиб борилмоқда.