Бирлашган Миллатлар Ташкилоти ҳомийлигида ташкил этилган Оролбўйи минтақасидаги Инсон хавфсизлигини таъминлаш бўйича Кўпшериклик траст жамғармаси бошқарув кенгашининг таклифлари бўйича иккинчи чақириқ доирасида умумий қиймати 6 миллион АҚШ долларидан зиёд учта лойиҳани молиялаштириш маъқулланди, деб хабар берди «Gazeta.uz».
«COVID-19 пандемияси даврида ва ундан ташқарида ўспиринларнинг саломатлиги, озиқланиши, сув таъминоти, санитария ҳолати, гигиенаси ва фаровонлигини яхшилаш ҳамда ёшларнинг салоҳиятини мустаҳкамлаш орқали Қорақалпоғистоннинг барқарор келажагига сармоя киритиш» деб номланган биринчи лойиҳа БМТнинг Болалар жамғармаси (ЮНИСЕФ), Гиёҳвандлик ва жиноятчилик бўйича бошқармаси ҳамда Аҳолишунослик жамғармаси томонидан биргаликда амалга оширилади.
Лойиҳа аҳолининг ижтимоий ҳимояга муҳтож қатлами, шу жумладан 5000 та бола ва ўспиринларнинг соғлиғи ҳамда овқатланишини яхшилашга қаратилган. Шунингдек, лойиҳа доирасида 10-17 ёшли 10 минг нафар қиз микроэлементлар билан таъминланади. Қорақалпоғистоннинг учта тумани – Мўйноқ, Қўнғирот ва Бўзатовдаги 15 та мактабда соғлиқни сақлаш инфратузилмаси яхшиланади.
Лойиҳа ҳар йили 181,2 мингдан зиёд одамни қамраб олади. Хусусан, 20 та бирламчи тиббий-профилактика муассасалари сув таъминоти инфратузилмаси ва санитария иншоотларини яхшиланади. Бундан ташқари, 520 нафар ёшлар малака ошириш дастурлари орқали билим ва имкониятларини кенгайтиради ва ўз маҳаллалари ҳаётига жалб қилинади.
«Оролбўйи минтақасидаги аҳолининг иқтисодий ҳамда озиқ-овқат хавфсизлигини ҳал қилиш учун мослашувчан салоҳиятини ривожлантириш орқали ёшлар ҳамда аҳолининг ёрдамга муҳтож қатламининг ижодий ва инновацион салоҳиятини тарғиб қилиш» деб номланган иккинчи лойиҳаси Бирлашган Миллатлар Ташкилотининг Тараққиёт дастури, Гиёҳвандлик ва жиноятчилик бўйича бошқармаси ва Озиқ-овқат ва қишлоқ хўжалиги ташкилоти томонидан амалга оширилади.
Дастур 1472 дан ортиқ қишлоқ ёшлари ва аёлларни қамраб олади. Хусусан, бошланғич лойиҳалар талабалар ўртасида тарғиб қилинади, 120 киши бизнес имтиёзларидан фойдаланади. Бундан ташқари, дастур 300 аёл ва ёшларга янги қишлоқ хўжалиги амалиётларини қўллаш, қишлоқ хўжалиги кооперативлари ва 9 та намойиш майдончаларини яратиш орқали 75 нафар ёшларни иш билан таъминлаш имкониятларини яратишга имкон беради. Шу билан бирга, 120 нафар талаба ва 300 нафар ёшлар рақамлаштиришга оид ташаббуслар, платформалар ва ижтимоий инфратузилма лойиҳалари орқали АКТ соҳасидаги ўзларининг профессионал салоҳиятини оширади.
«Қорақалпоғистонда соғлиқни сақлаш ва хавфсизликни универсал қамраб олиш йўлида» деб номланган учинчи лойиҳа эса Жаҳон соғлиқни сақлаш ташкилоти (ЖССТ) ҳамда Соғлиқни сақлаш вазирлиги билан ҳамкорликда амалга оширилади. Лойиҳа Мўйноқ тумани аҳолисининг тиббиёт муассасаларига, тиббий асбоб-ускуналарга ва соғлиқни сақлаш ишчиларига бўлган эҳтиёжларини келгусидаги сармоялар тўғрисида маълумот бериш учун баҳолайди.
Соғлиқни сақлаш соҳасига киритилган ушбу сармоялар минтақадаги инсон хавфсизлиги, шу жумладан, сув, энергетика ва йўл инфратузилмасини ҳисобга олади.
Оролбўйи минтақасидаги лойиҳалар 2020 йилдан 2023 йилгача амалга оширилади. БМТнинг Инсон хавфсизлиги бўйича Кўпшериклик траст фондига Ўзбекистон ҳукумати, Европа Иттифоқи, Финляндия, Норвегия ва Жанубий Корея донорлик қилади.
Аввалроқ ҳукумат қарори билан Орол денгизи ва Оролбўйи ҳудудларида ўрмонзор барпо этиладиган майдон белгилангани ҳамда Шавкат Мирзиёев Оролбўйи минтақасини экологик инновация ва технологиялар ҳудуди деб эълон қилиш ҳақида БМТ резолюциясини қабул қилишни таклиф этгани ҳақида хабар берилганди.
Изоҳ (0)