Навоий вилояти Зарафшон шаҳрида икки маст фуқаро ўртасида келиб чиққан жанжал улардан бирининг ўлими билан якунланди, дея хабар қилмоқда Тергов департаменти.
Маълум қилинишича, 2020 йилнинг 13 декабрь куни соат 10:00 да Зарафшон шаҳар 1-кичик туман 1-уй олдидаги дарахтзорда 45 ёшли Маннон Қ.нинг мурдаси ташқи тан жароҳатларсиз топилган.
Суд-тиббий экспертиза хулосасига кўра, Маннон Қ.нинг танасида қорин бўшлиғининг ёпиқ қўшма жароҳати, тўш суягини ёпиқ синиши, ичак тутқич артерияси ёрилиши каби тан жароҳатлари борлиги ҳамда айнан шу жароҳатлар унинг ўлимига сабаб бўлганлиги аниқланган.
Мазкур ҳолат юзасидан Зарафшон шаҳар ИИБ ҳузуридаги Тергов бўлинмаси томонидан номаълум шахсга нисбатан Жиноят кодексининг 104-моддаси 3-қисми «д» банди (одам ўлимига сабаб бўлган қасддан баданга оғир шикаст етказиш) билан жиноят иши қўзғатилган.
Дастлабки тергов жараёнида мазкур жиноятни 41 ёшли Томди туманида туғилган Сериқбол С. содир этганлиги, жанжалга эса ҳар икки фуқаронинг спиртли ичимлик таъсирида бир-бирларини сўкиб, ҳақорат қилганлари сабаб бўлгани аниқланган. Сериқбол С. жиноят иши бўйича айбланувчи тариқасида ишда иштирок этишга жалб қилиниб, унга нисбатан қамоққа олиш тарзидаги эҳтиёт чораси қўлланилган.
Аввалроқ Қорақалпоғистонда 79 ёшли аёл ва унинг набирасини ўлдирган шахс ҳибсга олингани, «Малика»да икки йигитнинг жанжали пичоқбозлик билан тугагани ҳамда Андижонда маст фуқарони болта билан уриб ўлдирган шахс 17 ярим йилга қамалгани ҳақида хабар берилганди.
Изоҳ (0)