Ислом тараққиёт банки (ИТБ) директорлар кенгаши 2020 йилнинг 19 декабрь куни Ўзбекистонда умумий қиймати 509,2 миллион долларга тенг бўлган иккита йирик ва иқтисодий жиҳатдан аҳамиятли лойиҳани молиялаштиришни маъқуллади, дея хабар бермоқда Инвестициялар ва ташқи савдо вазирлиги.
Маълум қилинишича, 200 миллион долларлик биринчи лойиҳа Қорақалпоғистон, шунингдек, Хоразм, Бухоро ва Навоий вилоятларида бир қатор инфратузилмавий ҳамда ижтимоий объектларни модернизация қилишни кўзда тутади.
Лойиҳа доирасида 1161 километр сув таъминоти тизимлари, 626 километр массив ичидаги ва мавзега олиб борувчи йўллар, 1154 километр паст кучланишли электр линиялари, 693 километр ирригация ва дренаж тармоқлари, 155 ўқув, тиббий ва 100 дан ортиқ бошқа иншоотларни қуриш ҳамда реконструкция қилиш режалаштирилган. Лойиҳанинг амалга оширилиши 710 мингдан ортиқ кишининг турмуш шароитини яхшилаш билан бирга, ушбу ҳудудларнинг барқарор ривожланишига сезиларли таъсир кўрсатади.
Банк томонидан 80 миллион доллар ажратилаётган иккинчи лойиҳа маҳаллий клиникаларни замонавий тиббий асбоб-ускуналар билан жиҳозлаш орқали саратон касаллигига чалинган беморларга тиббий хизмат кўрсатиш тизимини такомиллаштириш дастурининг иккинчи босқичини амалга оширишни кўзда тутади.
Лойиҳанинг амалга оширилиши саратон касаллигини эрта босқичларда аниқлашни йўлга қўйиш ва умуман даволаш сифатини яхшилаш имконини беради. 1,8 миллион нафардан ортиқ аёллар диагностика скринингидан ўтишга ва 150 минг саратон билан касалланган беморлар сифатли тиббий ёрдам олишга муваффақ бўладилар. Қайд этилишича, аввалроқ мазкур дастурнинг биринчи босқичи доирасида Ислом тараққиёт банки томонидан 37 миллион доллар миқдорида маблағ ажратилган.
Аввалроқ Ўзбекистонда ислом молиялаштириш тамойиллари асосида қимматли қоғозлар жорий этилиши, Ўзбекистоннинг Жаҳон мусулмон туризми рейтингидаги ўрнини янада яхшилаш чоралари кўрилиши ҳамда Ислом тараққиёт банки Ўзбекистондаги янги клиникаларни жиҳозлашга 17 миллион доллар йўналтиргани ҳақида хабар берилганди.
Изоҳ (0)