Islom taraqqiyot banki (ITB) direktorlar kengashi 2020-yilning 19-dekabr kuni O‘zbekistonda umumiy qiymati 509,2 million dollarga teng bo‘lgan ikkita yirik va iqtisodiy jihatdan ahamiyatli loyihani moliyalashtirishni ma’qulladi, deya xabar bermoqda Investitsiyalar va tashqi savdo vazirligi.
Ma’lum qilinishicha, 200 million dollarlik birinchi loyiha Qoraqalpog‘iston, shuningdek, Xorazm, Buxoro va Navoiy viloyatlarida bir qator infratuzilmaviy hamda ijtimoiy obyektlarni modernizatsiya qilishni ko‘zda tutadi.
Loyiha doirasida 1161 kilometr suv ta’minoti tizimlari, 626 kilometr massiv ichidagi va mavzega olib boruvchi yo‘llar, 1154 kilometr past kuchlanishli elektr liniyalari, 693 kilometr irrigatsiya va drenaj tarmoqlari, 155 o‘quv, tibbiy va 100 dan ortiq boshqa inshootlarni qurish hamda rekonstruksiya qilish rejalashtirilgan. Loyihaning amalga oshirilishi 710 mingdan ortiq kishining turmush sharoitini yaxshilash bilan birga, ushbu hududlarning barqaror rivojlanishiga sezilarli ta’sir ko‘rsatadi.
Bank tomonidan 80 million dollar ajratilayotgan ikkinchi loyiha mahalliy klinikalarni zamonaviy tibbiy asbob-uskunalar bilan jihozlash orqali saraton kasalligiga chalingan bemorlarga tibbiy xizmat ko‘rsatish tizimini takomillashtirish dasturining ikkinchi bosqichini amalga oshirishni ko‘zda tutadi.
Loyihaning amalga oshirilishi saraton kasalligini erta bosqichlarda aniqlashni yo‘lga qo‘yish va umuman davolash sifatini yaxshilash imkonini beradi. 1,8 million nafardan ortiq ayollar diagnostika skriningidan o‘tishga va 150 ming saraton bilan kasallangan bemorlar sifatli tibbiy yordam olishga muvaffaq bo‘ladilar. Qayd etilishicha, avvalroq mazkur dasturning birinchi bosqichi doirasida Islom taraqqiyot banki tomonidan 37 million dollar miqdorida mablag‘ ajratilgan.
Avvalroq O‘zbekistonda islom moliyalashtirish tamoyillari asosida qimmatli qog‘ozlar joriy etilishi, O‘zbekistonning Jahon musulmon turizmi reytingidagi o‘rnini yanada yaxshilash choralari ko‘rilishi hamda Islom taraqqiyot banki O‘zbekistondagi yangi klinikalarni jihozlashga 17 million dollar yo‘naltirgani haqida xabar berilgandi.
Izoh (0)