Қашқадарё ҳокими Зоир Мирзаев вилоятда фаолият юритаётган 15 нафар туман ва шаҳар ҳокимлари ўзига бириктирилган элчихоналар билан мулоқот қилмаётганини танқид қилди. Бу ҳақда 21 декабрь куни вилоят раҳбари раислигидаги йиғилишда маълум қилинди, дея хабар берди «Дарё» мухбири.
Вилоят ҳокимининг маълумот беришича, ҳудуд ҳокимларига элчихоналар билан мулоқот қилиш, уларга таклиф бериш ва ҳамкорликни йўлга қўйиш вазифаси юклатилган. Бироқ аксарият ҳокимлар бу вазифани умуман бажармаган.
Вилоят раҳбари билан мулоқот қилган Қамаши ва Қарши тумани ҳокимлари — Ботир Тоғаев ва Мақсуда Мустафоева ҳақиқатан ҳам элчихоналарга бириктирилганини, бироқ юклатилган вазифани ҳали бажармаганини тан олган.
«Ҳақиқатан ҳам элчихоналар билан ҳали мулоқот қилмадик. Айб ўзимизда», — деган Қарши тумани ҳокими Мақсуда Мустафоева.
Зоир Мирзаевнинг бу ҳақдаги саволига жавоб берган Қарши шаҳри ҳокими Нормўмин Холбоев унга Туркия, Германия ва Ҳиндистон элчихоналари билан мулоқот қилиб, ҳамкорлик қилиш вазифаси юклатилганини айтиб, ҳозирча Туркия элчихонаси билан мулоқот қилганини ва ҳамкорликни йўлга қўйганини маълум қилган.
Қашқадарё вилояти раҳбари туман ва шаҳар ҳокимларига мурожаат қилиб, Россияда Фарғона вилоятида етиштирилган помидор ва қалампирларга тақиқ қўйилгач, Фарғонадаги икки нафар туман ҳокими бу тақиқни олиб ташлаш учун элчихоналар билан мулоқот қилганини, масъулларнинг ҳолатни аниқлаштириш учун жон куйдирганини намуна қилиб таъкидлаган.
Эслатиб ўтамиз, аввалроқ Қарши тумани ҳокими Мақсуда Мустафоева бетоблиги сабаб туман аҳолисига ҳокимсиз мурожаатнома йўлланганди. Бу эса ижтимоий тармоқларда кўплаб муҳокамаларга сабаб бўлди.
Изоҳ (0)